Në Gjykatën e Tiranës është duke u zhvilluar seanca gjyqësore për çështjen e mashtrimit me vlerë 1.2 milionë euro në dëm të buxhetit të shtetit, për të cilën akuzohet edhe Sekretari i Përgjithshëm i Ministrisë së Financave, Arlind Gjokutaj.
Ai u arrestua dy ditë më parë së bashku me Drejtorin e Shërbimeve mbështetëse dhe çështjeve ligjore në MF, Fatmir Hoxha dhe përmbaruesin privat Alban Ruli.
Treshja në fjalë akuzohen për “shpërdorim detyre”, pasi në bashkëpunim me njëri-tjetrin kanë firmosur shkresa për t’i kaluar 1.2 milionë euro në llogaritë e Ilir Thanës, duke e trajtuar si ish-pronar dhe duke rivlerësuar dy herë një prej pronave të tij.
Deri në momentin e arrestimit Ilir Thana kishte arritur të merrte 400 mijë euro nga procedura në fjalë, ndërsa ryshfeti për tre zyrtarët ishte 82 milionë lekë.
Por teksa të akuzuarit pritet të njiheshin me masën e sigurisë, Arlind Gjokutaj është transferuar nga paraburgimi për në spital dhe jo në sallën e gjyqit.
Sipas avokatit të tij, 41-vjeçari ndodhet në spital pasi ka shfaqur probleme kardiake. Gjokutaj pritet të qëndrojë në spital deri në momentin që do përmirësohet gjendja e tij shëndetësore, ndërsa mësohet se masa e sigurisë do t’i komunikohet atje.
