Të shtëna me armë zjarri në Fier, në afërsi të një qendre tregtare.
Sipas raportimeve të para bëhet me dije se një person i paidentifikuar ka mbetur i plagosur dhe është transportuar me urgjencë për në spital.
Gjithnjë sipas të njëjtave burimeve, autorët qëlluan të paktën 3 herë në drejtim të personit në fjalë dhe një prej plumbave e prekën në pjesën e barkut.
Autorët mësohet se udhëtonin me një makinë tip “Toyota”. Aktualisht e gjithë zona është rrethuar nga forcat e policisë, ndërsa i plagosuri është dërguar në spital. Identiteti i të plagosurit nuk dihet ende.
Dëshmitarë okularë nga vendi i ngjarjes thonë se i plagosuri ishte me vajzën e tij të vogël (rreth 7-8 vjeç), kur persona ende të paidentifikuar qëlluan me armë zjarri në drejtim të tij.
Pamjet nga vendi i ngjarjes:
NJOFTIMI I POLICISË:
“Plagosi me armë zjarri një shtetas, pas një konflikti të çastit, identifikohet dhe shpallet në kërkim autori i dyshuar.
Shërbimet e Policisë kanë ngritur pika të shumta kontrolli, në të gjithë territorin e qarkut, me qëllim kapjen e tij.
Rreth orës 13:15, në lagjen “11 janari”, dyshohet se pas një konflikti të çastit, shtetasi A. N., 52 vjeç, ka plagosur me armë zjarri, shtetasin D. M., 50 vjeç, i cili ndodhet në spital, nën kujdesin e mjekëve.
Vijon puna intensive për kapjen e shtetasit A. N. Grupi hetimor ndodhet në vendngjarje dhe po punon për zbardhjen e plotë të kësaj ngjarjeje”
