Nëse Lushkja nuk u arrit, Partizani hap një tjetër “betejë” me Tiranën. Të kuqtë kërkojnë një sulmues qendre, teksa në rast se Skuka largohet, ky mision kthehet në urgjencë. Bëhet fjalë për një bomber race, nga ata që të paktën deri para pak vitesh dilnin në Shkodër, Bekim Balajn.
Autori i 9 golave në Kombëtaren e Shqipërisë me largimin nga Boluspori, duket se e ka mbyllur aventurën e tij “maratonë” nëpër liga të rëndësishme në Europë dhe po përgatitet të rikthehet për një “kërcim të fundit” atje ku hodhi hapat e parë dhe nisi rrugëtimin e tij, Kategorinë Superiore.
Kandidatët për 31-vjeçarin janë të shumtë. Më parë është përfolur për Tiranën dhe Vllazninë, si dhe Shkëndijën e Tetovës, që qëndron gjithnjë vigjilente për yjet shqiptarë. Gjithsesi, në garë ka hyrë edhe Partizani.
Bekim Balaj do të përbënte një dyshe të frikshme në sulmin e të kuqve, por do të ishte edhe një zëvendësues perfekt për Skukën në rast se dibrani largohet drejt Italisë, ku e kërkojnë tri klube, Empoli, Leçe dhe Hellas Verona, që duket më këmbëngulëse në lëvizjet e saj, por ditët e fundit duket se e ka humbur durimin dhe ka nisur kërkime për të tjera. Gjithsesi, deri në fund të janarit zhvillimet do të jenë shumë dinamike dhe situatat mund të ndryshojnë brenda pak orësh e jo më ditësh.
“Panorama Sport” raporton se ashtu si me Lushkjen, me të cilin komunikoi personalisht, presidenti Gazment Demi ka pasur një takim me yllin e Kombëtares, ku i ka shfaqur interesin për ta afruar në gjirin e ekipit.
Edhe në këtë rast presidenti i ka kërkuar Balajt pak durim për pak ditë, sapo të qartësohet situata e Skukës, por edhe të ndonjë lojtari tjetër, që mund të largohet.
Balaj e ka pranuar këtë kërkesë të presidentit të kuq, por merkatoja ka shumë zhvillime dhe duhet vepruar shpejt në rast se duan ta fitojnë këtë “betejë”, ndryshe nga çfarë ndodhi me Lushkjen.
