Para se të vendosej masa e sigurisë “arrest në burg” sot për të, Havier Dobi ka rrëfyer para hetuesve të policisë së Tiranës, të gjithë intinerarin e lëvizjeve të tij dhe të nënës Rozeta Dobi ditën kur grabitën në banesën e zyrtares Alda Klosi kasafortën me 120 mijë euro dhe 30 mijë dollarë.
Ndonëse u shpreh se fillimisht nuk e kuptoi që nëna e tij me profesion pastruese kishte vjedhur kasafortën në banesën ku punonte, i riu pranoi se me një pjesë të parave blenë dy mjete tip “Mercedes Benz” që ishin në pronësi të tij.
Pikërisht me një nga këto mjete, “Benzi-n” me targa AC055HD me ngjyrë të zezë, Havier Dobi është ndaluar nga policia 19 ditë pasi ishte denoncuar nga Alda Klosi grabitja në rrugën e “Kosovarëve”.
Ai shihet në një video teksa është ndaluar nga policia me makinën në fjalë mbrëmjen e datës 3 janar, ku dhe është gjobitur me 55 mijë lekë gjobë për disa shkelje të Kodit Rrugor.
Në fletën e gjobës të lëshuar nga policia, thuhet se Havier Dobi po udhëtonte pa vendosur rripin e sigurimit, ndërsa mjeti tip “Benz” i ka xhamat komplet të errëta në shkelje me ligjin. Gjithashtu edhe targa e makinës së të riut nuk ishte vendosur në vendin e duhur.
