Grabitja spektakolare e 700 mijë eurove në banesën e ish-shefes së kabinetit të Arben Ahmetajt nga sanitarja Rozeta Dobi dhe djali i saj Havier Dobi, ka detyruar edhe bashkëshortin e saj Spartak Dobi që të prononcohet për mediat dhe të sqarojë pozitat në të cilat ndodhet familja e tij.
Në një intervistë të dhënë dje, Dobi e adresoi të gjithë përgjegjësinë te bashkëshortja e tij Rozeta dhe tha se i biri mund të jetë bërë pjesë e grabitjes i influencuar nga e ëma.
Spartak Dobi madje tha dje për Euroneës Albania se ka marrë një pretim nga ministri i Drejtësisë, Ulsi Manja për t’ia liruar të birin dhe kërkoi dënim maksimal për bashkëshorten e tij.
“Sot kam qëndruar gjithë ditën me ministrin e Drejtësisë. i kam treguar për ngjarjen e më tha do të bëjmë çmos që djalin ta lirojmë por gruan jo. i thashë gruan çojeni më tej Stambollit. Djali nuk ka faj, e ka mësuar e ëma. i kishim në rregull të gjithë gjërat. Djali shkonte punonte natën”, tha bashkëshorti pastrueses-grabitëse.
Por për deklaratën në fjalë ka reaguar sot ministri i Drejtësisë, Ulsi Manja, duke hedhur poshtë pretendimet, madje duke theksuar se nuk e njeh Spartak Dobin dhe familjarët e tij.
“Mbrëmjen e djeshme u njoha me një intervistë të dhënë nga bashkëshorti dhe babai i dy të akuzuarve për vjedhjen e një shume parash në Tiranë. Kushdo që do ta shihte atë intervistë do e kuptonte lehtësisht gjendjen e rënduar të personit të intervistuar.
Dua të besoj se ishte pikërisht kjo gjendje e rënduar arsyeja që e ka shtyrë zotin Dobi të shpikë edhe takimin me mua, apo dialogun imagjinar që paskemi pasur me njëri-tjetrin. Por teksa gjendja psikologjike e një pensionisti që vuan arrestimin e djalit dhe gruas mund të kuptohet, është e pajustifikueshme përdorimi që i bëhet këtij personi nga media për qëllime kryekëput politike.
E vërteta është se unë kurrë nuk jam takuar me Spartak Dobin. Madje as nuk e njoh këtë person, as familjarët e tij. Sikurse unë kurrë nuk kam punuar në Bashkinë e Tiranës, pavarësisht pretendimeve të personit në fjalë. Si Ministër i Drejtësisë, unë mbështes plotësisht hetimet e organeve përgjegjëse dhe inkurajoj zbardhjen e plotë të ngjarjes dhe dënimin e fajtorëve”, shkruan Manja në Facebook.
