Seria A duket se është një kampionat që luhet edhe jashtë stadiumeve, teksa ultrasit nga tifozeria e Romës dhe ajo e Napolit janë përleshur duke kthyer në një “shesh-betejë” një pjesë të autostradës “del Sole”.
Skenat e dhunshme ndodhën në pjesën midis Monte San Savino dhe Arezzos, pranë zones së shërbimit “Badia al Pino”, ku vdiq tifozi i Lazios Gabriele Sandri më 11 nëntor 2007.
Kjo bëri që korsia veriore e A1 të mbyllej për disa orë, me pasoja të rënda në trafik. Ultrasit e Napolit janë nisur drejt Genovas për ndeshjen në “Marassi” kundër Sampdorias të planifikuar për në orën 18:00, ndërsa tifozët verdhezinjë po udhëtojnë drejt Milanos ku do të zhvillohet ndeshja mes Milanit dhe Romës në orën 20:45 në San Siro.
Patrullat e policisë rrugore nga seksioni Battifolle ishin në vendngjarje, ndërsa raportohet se një tifoz i Romës është plagosur lehtë me thikë.
Sipas asaj që është mësuar nga selia e policisë së Arezzo-s, përleshja nisi pas pritës së vendosur nga një grup ultras i Napolit ndaj romanistëve të cilët ishin në tranzit për të mbërritur në Milano.
Një gjuajtje reciproke me gurë ndezi përleshjen që çoi deri në përdorimin e gazit lotsjellës. Policia, për të evituar situata të tjera të rrezikshme, ka bllokuar edhe qarkullimin autostradë.
