Nga Boldnews.al
Autoriteti Kombëtar i Ushqimit tregoi një “tolerancë të tepruar” ndaj kompanisë së ujit “Lajthiza”, pas helmimit të tre qytetarëve, në një lokal në Shkodër, në 29 dhjetor 2022.
Sipas një praktike të konsoliduar ndër vite, AKU vendos “tërheqjen e menjëhershme të mallit”, në rastet kur dyshohet ose ka indicje të forta se ai mund të shkaktojë efekte të rënda mbi shëndetin e konsumatorëve. Ky veprim është një detyrim që rrjedh nga legjislacioni mbi kontrollin ushqimor.
Por, ky standart nuk u aplikua për ujin e ambalazhuar “Lajthiza”, i cili dyshohet se ishte shkaktari i problemeve të theksuara shëndetësore të tre qytetarëve-nënë e bir dhe kamarieri i lokalit.
Të tre personat deklaruan që në momentin e parë se kishin pirë ujë nga e njëjta shishe dhe ishin ndjerë menjëherë në gjendje të vështirë, pasi produkti përmbante një lëndë si acid.
Në lokal shërbehej ujë “Lajthiza” dhe dega rajonale e Autoritetit Kombëtar të Ushqimit Shkodër kreu disa analiza paraprake.
Analizat fillestare treguan se mostra e marrë nga uji i ambalazhuar ishte në parametra normale. Megjithatë, siç citohet në një dokument të siguruar nga media “rezultati është i vlefshëm vetëm për mostrën e ujit të sjellë në laborator”.
Pra, ai rezultat nuk është përfundimtar për ta përjashtuar si shkak për helmimin e tre shkodranëve.
AKU refuzoi të bënte publik emrin e kompanisë që kishte tregtuar mallin e dyshuar, duke ruajtur një lloj konfidencialiteti të tepruar, pavarësisht se produkti mund të shkaktonte rrezik edhe për qytetarë të tjerë.
Po ashtu, AKU nuk aplikoi “tërheqjen e menjëhershme” të mallit, siç ka vepruar në shumë raste të ngjashme.
Në mënyrë periodike, Autoriteti Kombëtar i Ushqimit njofton për tërheqje malli nga tregu, duke përmendur emrin e mallit dhe kompaninë që e tregton apo e importon, edhe në ato raste kur të dhënat e institucionit janë tërësisht sipërfaqësore.
Por, për rastin e helmimit të dyshuar nga “Lajthiza” në Shkodër, institucioni më i rëndësishëm i kontrollit të produkteve ushqimore, zgjodhi heshtjen dhe fshehjen pas konfidencialitetit, duke vënë në pikëpyetje integritetin e Autoritetit.
Burime nga spitali rajonal i qytetit deklaruan për “Boldnews.al” se, fatmirësisht, gjendja e tre pacientëve, të cilët kishin pirë ujë nga një shishe e ambalazhuar e kompanisë “Lajthiza”, është e mirë dhe e stabilizuar.
Ndërsa Prokuroria e Shkodrës po vijon hetimet për të identifikuar me prova shkencore shkakun që kërcënoi seriozisht shëndetin e tre personave në momentin e parë.
Prokurorët kanë kërkuar ekspertiza më të thelluara mbi ujin e ambalazhuar e produktet që kanë qenë në lokal, për të identifikuar shkakun e vërtetë të helmimit, i cili goditi në mënyrë të menjëhershme dhe të njëllojtë tre persona, me mosha dhe karakteristika fizike të ndryshme.
