Autorët e dyshuar të grabitjes së mbrëmshme në Durrës janë identifikuar. Raportohet se të rinjtë janë banorë të zonës dhe po punohet për arrestimin e tyre. Ndërkohë që pronarja e dyqanit që u grabit, Mimoza Danushi ka folur duke treguar detaje se si autorët e grabitën.
Ajo ka theksuar se fillimisht ka parë një makinë tip ‘Ford Focus’ me të cilët autorët e ngjarjes shkuan te ushqimorja e saj, morën 150 mijë lekë dhe u larguan.
“Isha duke qëndruar e ulur. Pash nga dera që kaloj një makinë Ford, që ndaloi pak metra më lart. Ishte shumë qetë dhe nuk i kushtova vëmendje. Kur për një moment u futën dy djem në dyqan me kapuca në kokë dhe njëri që ishte pak më i vogël më tha na jep lekët se të vramë. Unë mendova mos ishin djemtë e lagjes dhe e shtyva atë të voglin. Dil përjashta më lër rehat i thash. Kur në këtë moment ky tjetri nxorri armën dhe ma drejtoi. Ja kapa dorën dhe ja ngrita lartë, po në këtë moment u rrezua banaku dhe ranë lekët në tokë. I mblodhi ky që ishte pak më i vogël dhe ikën. Gjithcka ka ndodhur për dy minuta. U tremba shumë. Nuk kisha 15 mijë lekë kisha më shumë. I morën të gjitha“, ka treguar Danushi për mediat.
Përveç dy personave që u futën në dyqan, në kërkim është shpallur dhe një i tretë, i cili dyshohet se kishte rolin e shoferit.
