Forcat Speciale RENEA kanë bastisur banesën e Ervis Martinajt në Surrel, me urdhër të SPAK, pasditen e sotme.
Kontrollet janë duke u kryer në kuadër të operacionit Plumbi i Artë dhe vijimi i operacionit në Fushë Kuqe, ku u ushtuan kontrolle në shtëpinë e Martinajt dhe të afërmve të tij.
Sipas disa raportimeve mediatike, nuk janë gjetur sende të kundraligjshme. Raportohet se në banesë janë marrë disa dokumente. Gjatë kontrolleve, në banesë nuk ka qenë asnjë familjar i Martinajt.
Disa javë më parë forcat e policisë zhvilluan kontrolle në banesën e të afërmve të Martinajt në Fushë-Kuqe. Gjatë kontrolleve, u gjetën armë të fshehura në koshere bletësh.
Zhdukja
Ervis Martinaj, i cilësiar si ish “Mbreti i Kumarit” u denoncua i zhdukur në muajin gusht të vitit të kaluar, teksa ishte shpallur në kërkim në kuadër të operacionit “Plumbi i Artë”, që erdhi pas dëshmisë së Nuredin Dumanit. Ky i fundit deklaroi para hetuesve se Martinaj i kishte dhënë një shumë të konsiderueshme parash dhe i kishte premtuar një pjesë më të madhe për ekzekutimin e Endrit Doklen.
Pas dëshmisë së Dumanit, ndaj njerëzve të besuar të Martinajt pati një seri atentatesh ku më i rëndi ishte ai te mbikalimi i Fushë Krujës ku iu ekzekutua Kusheriri Brilant Martinaj dhe dy miqtë e tij Dikler Vata dhe Besmir Hoxha.
Krimi u shënua mesditën e 17 korrikut dhe 5 ditë më vonë ne Milot u tentua të vritej Ylli Brahja, i njohur si i besuar i Martinajt.
Brahja u plagos ndërsa mbeti i vrarë Klisman Prenci.
Më 9 gusht, xhaxhai i të shumëkërkuarit Ervis Martinaj denoncoi humbjen e kontakteve me nipin, ndërsa ai ishte në arrati.
Prej asaj dite, askush se di me siguri se çfarë ka ndodhur Martinajn, ndërsa prokuroria e Kurbinit po heton për dyshimet për rrëmbim dhe zhdukje të tij. Nga autoritetet, nuk është përjashtuar as pista e inskenimit të zhdukjes nga vetë Martinaj.
Zhdukja pa gjurmë e tij çoi në arrestimin e Jeton Lamit, oficer policie, i cili u zbulua se e shoqëronte ne arrati.
Akuzat për Ramën
Familjarët kanë akuzuar vetë kreun e qeverisë Edi Rama për zhdukjen e nipit.
Në një intervistë televizive në Nëntor, xhaxhai i Ervis Martinajt u shpreh se është i sigurt se nipin e kanë vrarë dhe gishtin e akuzën e ngriti nga kryeministri Edi Rama.
“Ne e dinim, se ne na e ka dhanë mesazhin ky kryeministri i Shqipërisë, fatkeqësi kombëtare, kryekrimineli i kombit shqiptar, Edi Rama na e ka dhënë mesazhin që në fushatën e vitit të kaluar, që i ka thënë se “i them atij drejtorit të basteve” dmth që atëherë na ka kërcënu, se “ia dimë targën e makinës” e kështu dmth. Unë e di zhdukjen e nipit tim, është kryeministri, organizatori është kryeministri Edi Rama me bandat e tij edhe me gjithë oligarkët që i kanë interesat nga bregdeti i jugut. Kryesori, kryekrimineli i zhdukjes së nipit tim. Se hasmi të vret, nuk të zhduk kufomën”, tha ai, në një intervistë për emisionin “Pa Gjumë” në Report Tv.
Për çështjen ka folur dhe kreu i PD-së, Sali Berisha, i cili po ashtu ka hedhur akuza ndaj Ramës.
“Nuk ka sektor që ky nuk ka shtrirë tentakulat e veta. Ia morën lojërat e fatit Ervis Martinit dhe tani thotë ku është. E di vetë ai ku është. Ai ishte biznesmen i lojërave të fatit. Olsi Rama është përfolur si njeriu në hije i lojërave të fatit”, tha Berisha në një deklaratë më 21 Gusht.
