Policia kufitare në Rinas ka vënë në pranga një shtetas turk, i cili tentoi të kalonte kufirin me dokumente të falsifikuara.
Autoritetet kanë arritur të gjejnë dhe personin i cili dyshohet ta ketë pajisur 30-vjeçarin turk me letërnjoftim të rremë. Për këtë Policia e ka shpallur në kërkim, ndërsa rezulton të jetë edhe ai shtetas turk.
“Shërbimet e Policisë Kufitare Rinas, në vijim të kontrolleve të detajuara të dokumentacionit që paraqesin shtetasit që hyjnë dhe dalin në këtë pikë të kalimit kufitar, kanë evidentuar dhe goditur një tjetër rast të tentativës për të kaluar kufirin në mënyrë të paligjshme, me dokumente false.
Në përfundim të veprimeve hetimore u arrestua në flagrancë, për veprën penale “Falsifikimi i letërnjoftimeve, i pasaportave ose i vizave”, shtetasi E. B., 30 vjeç, banues në Turqi.
Gjithashtu, u shpall në kërkim shtetasi M. K., 40 vjeç, banues në Turqi. Shërbimet e Policisë, gjatë kontrollit të dokumentacionit të shtetasit E. B. kanë dyshuar se ky shtetas nuk kishte paraqitur dokumentin e tij të identifikimit.
Gjatë kontrollit të detajuar me pajisjet logjistike bashkëkohore që tashmë ka në dispozicion Policia Kufitare, rezultoi se dokumenti që ai kishte paraqitur ishte i falsifikuar, si dhe pas verifikimeve të kryera rezultoi se e kishte siguruar dokumentin e falsifikuar, nga shtetasi M. K.”- njofton policia.
Materialet i kaluan Prokurorisë pranë Gjykatës së Rrethit Gjyqësor Tiranë, për veprime të mëtejshme.
