Protesta e punonjësve të rrobaqepsisë në Bilisht ka dhënë rezultate.
Euronews Albania ka mësuar përmes kryetares së sindikatës, Mirjeta Mulla, se të gjitha rrobaqepëseve u është komunikuar rikthimi në punë.
Ndërkohë që edhe grave të cilat u ishin mbajtur një pjesë e pagës, u është bërë likuidimi total ditën e djeshme përmes bankës.
Gjithashtu bëhet me dije se sindikata e ngritur nga vetë punonjëset e rrobaqepsisë do të njihen nga pronari.
Kujtojmë se protesta e punonjësve të fasonërisë nisi pasi pronari i subjektit privat pushoi nga puna kryetaren e sindikatës dhe mbajti një pjesë të pagës në sektorin e prerjes.
Të enjten inspektoriati i punës pezulloi aktivitetin e biznesit pasi nuk ishte respektuar liria sindikale e punonjësve.
