Detaje të reja kanë dalë në dritë nga vdekja e 26- vjeçares shqiptare, Donatella Hodo, në gusht të vitit 2022.
Mediat italiane kanë zbuluar se Donatella Hodo, kishte bërë një përpjekje për të dalë nga rruga e errët ku ishte futur për shkak të varësisë së saj nga droga, duke kërkuar edhe ndihmën e Maria de Filippit.
Mësohet se Donatella i kishte shkruar një letër nga burgu Maria De Filippi-t, ku i kërkonte ndihmë. “Të lutem më ndihmo, dua t’ja filloj nga e para”, shkruhej mes rreshtave.
Por kjo letër nuk kishte mbërritur kurrë në duart e moderatores së programit të njohur në Itali.
Letra
“Përshëndetje Maria, po ju shkruaj këtë letër për t’ju treguar historinë time dhe për t’ju kërkuar ndihmë. Unë quhem Donatella Hodo, sapo kam mbushur 26 vjeç, kam origjinë shqiptare por jam rritur në Itali. Tani për fat të keq e gjej veten në burgun e Montorios, përfundova këtu sepse kam pasur një fëmijëri dhe adoleshencë të vështirë me kaq shumë probleme, nuk pata forcë të reagoja dhe gjeta ngushëllim tek droga…”
“Maria…jam 26 vjeç, kam ende një jetë përpara, dua të qetësohem, të kem një të ardhme, të kthehem në kontakt me familjen time të mrekullueshme… Sot kam dëshirën, guximin dhe dua të ndryshoj, dua të filloj nga e para dhe të lë çdo gjë pas krahëve, kam nevojë për ndihmë, për të gjetur një punë…” ka shkruar Donatella.
Letra është dërguar nga burgu Veroneze i Montorios, përpara se e reja të vendoste t’i jepte fund jetës në qeli, por, për fat të keq, kjo letër nuk arriti kurrë në duart e Maria De Filippi, ndoshta një adresë e gabuar, e cila e solli letrën në shtëpinë e prindërve të saj, në duart e babait të saj Nevruz, kur vajza e tij nuk jetonte më.
Donatella Hodo, vrau veten duke thithur gaz në burgun Veronese të Montorios më 2 gusht . E reja shqiptare kishte probleme me varësinë ndaj drogës. Ajo ishte në burg për disa vjedhje në farmaci.
Burimi: il Mattino.it
