Dy ditë kokë më kokë me ministrat e tij në “Vilën 30” të qeverisë duket se nuk kanë qenë edhe aq vizionare për t’i dhënë jetë projekteve dhe punëve për të cilat Shqipëria ka nevojë dhe që mund të merrnin drejtim në vitin 2023.
Edhe pse shefi i qeverisë në postimin e ndarë në rrjetin social Facebook ku njoftonte ndjekësit për mbledhjen me kabinetin e tij qeveritar në mes të ish-Bllokut shkruante: “Projekte konkrete dhe punë konkrete…”, duket se fotot s’tregojnë të njëjtën gjë.
Të paktën një prej fotove të shkrepura në mbledhjen dy ditore të Ramës me ministrat ka zbuluar se “projektet” që pretendon Rama në letrën e bardhë para tij janë thjesht shkarravina dhe objekte pa formë dhe kuptim, njëjtë si skulpturat e tij të pakuptimta që ekspozon në galeritë më të shtrenjta të Europës më paratë e buxhetit të shtetit.
Në foto për më tepër duket edhe një qen (ndoshta maçok) që qëndron në bisht, por se për çfarë do t’i shërbejë ky “projekt vanitoz” shqiptarëve të zhytur në krizë të thellë ekonomike dhe të prirur për të braktisur vendin, kjo mbetet për t’u parë.
Duket se ministrat “plot ide” të Ramës e kanë humbur këtë herë sharmin për t’u shndërruar në muzë që frymëzon shefin e qeverisë, e madje as t-shirt i kuq që mban veshur nuk i ka bërë punë.
Edhe pse ata duken të fokusuar dhe disa prej tyre mbajnë madje shënime teksa përballë kanë një monitor me shifra, miliona e investime, ajo çka pasqyron tryeza e shefit të tyre Kryeministër lë për të dëshiruar në lidhje me punët e mira që shqiptarët presin nga qeveria.
