2023 nuk nis mirë për Tiranën, që shtyn me të paktën 24 orë nisjen e përgatitjeve për rillimin e kampionatit. Bardheblutë duhet të dilnin në stërvitje në Skënder Halili, në datën 3 janar, por lojtarët refuzuan të fillonin përgatitjet. Situata financiare e klubit e ruajtur me fanatizëm deri në pauzën e kampionatit, ka shpërthyer tani me grevën e skuadrës. Burime brenda klubit Tirana bëjnë me dije se futbollistët kanë dy rroga të pa marra, ndërsa trajner Orges Shehi edhe më shumë: katër.
Pikërisht ky reagim i lojtarëve ka bërë që presidenti Refik Halili të thërrasë një mbledhje urgjente, në tentativë për të qartësuar situatën. Bardheblutë janë për momentin në vendin e dytë me 25 pikë, 4 pas të kuqve, por ky ngërç i fillimit të vitit mund të jetë penalizues. Rezultatet e fundit të kryeqytetasve nuk kanë qenë të mira, me humbje ndaj Teutës e më pas në derbin me Partizanin. Pikërisht këto e zbritën skuadrën e Shehit në vendin e dytë, katër pas të kuqve. E ndoshta e gjitha lidhet me situatën financiare të krijuar, që mund të shkaktojë jo pak dëme në objektivat e klubit.
MERKATO E BLLOKUAR
Të gjitha të dhënat të cojnë te ngërci financiar lidhur me pagesën që Tirana duhet të bëjë për dy lojtarët Torassa e Kale. Sipas burimeve brenda klubit bëhet fjalë për mbi 100 mijë euro. Problemi megjithatë nuk mbetet vetëm aty, sepse edhe merkato e Tiranës është bllokuar dhe asnjë lojtar nuk mund të përforcojë skuadrën, pa u likuiduar pagesa. Në këtë pikë shpresa më e madhe e bardhbluve është të shesë ndonjë nga lojtarët e rëndësishëm, mundësisht jashtë kufijve. Vetëm se sipas asaj që mësohet asnjë kërkesë nuk ka mbërritur as për Xhixhën, më i kuotuari për të patur interesim e as për Ismajlgecin, një që sesionet e fundit ka qenë gjithnjë i përfolur për një transferim në klube të huaja.
