Periudha post-festave të fundvitit pritet të dominohet nga beteja të ashpra midis mazhorancës dhe opozitës jo vetëm në Parlament por edhe në sfida ligjore në Gjykatat e vendit.
Dy çështjet më të nxehta që tashmë kanë marrë dritën jeshile nga Gjykata Kushtetuese janë padia kundër dhënies me koncesion nga qeveria të Parkut kombëtar të Butrintit dhe ajo për mandatin e ministres së Jashtme Olta Xhaçka.
Por, pas tyre Kushtetuesja ka pranuar edhe shqyrtimin e padisë së një grupi deputetësh të PD, ku kërkohet shkrirja e Bordit të Transparencës që dikton çmimet e karburantit në vend por edhe të ushqimeve bazë.
Në kërkesë-padinë e PD kërkohet shfuqizimi i kompetencave të strukturës që vendos çmimet e produkteve ushqimore dhe Autoritetin e Konkurrencës, me gjykatën që ka caktuar 31 janarin si ditën kur do zhvillohet beteja e parë ligjore e demokratëve.
Të ashtuquajtura borde të Transparencës tashmë do të duhet të kalojnë në filtrin Kushtetues.
Bordet e Transparencës, u ngritën nga qeveria në mars të 2022 me qëllim zbutjen e krizës se çmimeve si pasojë e luftës në Ukrainë, por për opozitën këto struktura shërbyen për të ligjëruar interesat e bizneseve të caktuara ne mungesë të plotë të transparencës dhe jo për të ndihmuar shqiptarët.
Demokratët janë kështu në pritje që Kushtetuesja të “çmontojë” Bordin “komunist” të Ramës që dikton çmimin e karburanteve me argumentin se ky bord është ngritur me qëllimin favorizimin e një grupi oligarkësh në kurriz të qytetarëve.
