Ministri i Jashtëm i Greqisë, Nikos Dendias ka zgjedhur ta mbyllë vitin 2022 me një mesazh direkt për aleatin e NATO-s dhe fqinjin me të cilin “përplasin brirët” në mënyrë të vazhdueshme, pikërisht Turqinë.
“Nuk do të tolerojnë askënd që të na vendosë në dyshim sovranitetin”, tha Dendias, teksa i referohej Turqisë në një deklaratë të dhënë sot, ku ndër të tjera nënvizoi se Greqia po përballet me sifda të paprecedente në Egje.
“Përsërisim se sovraniteti kombëtar dhe integriteti territorial i vendit tonë nuk janë objekt debati dhe nuk pranojnë as edhe dyshimin më të vogël”, u shpreh më tej ai.
Ministri i Jashtëm grek gjithashtu shprehu besimin se zhvillimet në Evropë pas pushtimit rus të Ukrainës përbëjnë tashmë një skenar shumë të ndryshëm, i cili kërkon vigjilencën e komunitetit europian dhe ndërkombëtar për t’u përballur me sfidat shumë serioze.
“Pikërisht këto janë sfidat e revizionizmit që lidhen drejtpërdrejt me interesat tona kombëtare. Siç e tregova me tre vizitat e mia në Ukrainë pas pushtimit rus, narrativa specifike dhe mënyra specifike e të menduarit mund ta kthejnë rajonin e Mesdheut Lindor në një “fuçi baruti”, nënvizon Nikos Dendias.
Në deklaratën ku shpalosi synimet e politikës së jashtme greke dhe përshkroi sfidat për vitin 2023, Dendias gjithashtu tha: “Politika e jashtme e vendit tonë është qeverisur nga parime gjatë gjithë kohës dhe është e ndërthurur me stabilitetin, sigurinë, respektimin e pavarësisë dhe integritetit territorial të shteteve, respektimin e së drejtës ndërkombëtare dhe të drejtës ndërkombëtare të detit”.
