Qëndrimi pas hekurave i kryebashkiakut të sapozgjedhur të Himarës, Fredi Beleri, vijon të mbetet një çështje me rëndësi të veçantë për Athinën zyrtare.
Në një intervistë të publikuar këtë mbrëmje në “Protothema” ku analizon të gjitha raportet me fqinjët dy ditë para zgjedhjeve parlamentare në Greqi, ministri i Jashtëm atje, Nikos Dendias tregon se panorama e marrëdhënieve greko-shqiptare ishte një situate në përmirësim deri në arrestimin e Belerit.
Sipas shefit të diplomacisë helene, përderisa nuk dalin prova të pakundërshtueshme Berleri duhet që të lirohet, por çështja “përbën një rrezik të madh për marrëdhëniet greko-shqiptare”.
“Jemi 2-3 ditë përpara një procedure ku do të vendoset nga ajo që na informojnë këshilltarët tanë ligjorë në Tiranë nëse do t’i zgjatet paraburgimi kryebashkiakut Beleri. Që në fillim e kam përsëritur qëndrimin e kryeministrit Rama. Se nëse nuk ka prova të forta, e gjithë afera është skandaloze. Por përtej kësaj, është edhe çështja e rezervimit. Në shtetin e së drejtës, një kryetar i zgjedhur, për një vepër si ajo për të cilën pretendohet se akuzohet, nuk ndalohet. Sigurisht që do të gjykohet, nuk kemi arsye të ndërhyjmë në drejtësinë e pavarur të një vendi mik, por ndalimi i tij mendoj se i kalon kufijtë e logjikës“, tha Dendias.
Sipas tij pala greke dhe shqiptare ishin drejt arritjes së një marrëveshje për të dërguar marrëveshjen e Detit në Hagë, por raporti u kris nga rasti Beleri.
“Kam besuar dhe besoj se jemi shumë pranë një marrëveshjeje për t’ia referuar mosmarrëveshjes në Hagë. Ka pasur një përzemërsi personale mes kryeministrit Kyriakos Mitsotakis dhe kryeministrit Rama dhe mes meje dhe kryeministrit Rama. Arrestimi i kryebashkiakut Beleri duhet të them është një rrezik i madh për marrëdhëniet greko-shqiptare. Shpresoj që mençuria dhe arsyeja dhe shteti ligjor të mbizotërojë dhe ky rrezik të shmanget. Por nuk mund ta nënvlerësoj problemin që është krijuar papritur”, tha Dendias.
Arrestimi i Belerit ka shkaktuar shumë bujë të madhe në vendin tonë dhe në atë fqinj, Greqinë. Pasi u bë ndalimi i tij, në vendin tonë mbërriti zëvendësministri i jashtëm Miltiadis Varvitsiotis, i cili tha se Greqia ka ashpërsuar qëndrimin e saj ndaj Shqipërisë dhe është e vendosur të ngrejë pengesa për perspektivat e saj të pranimit në BE dhe të bllokojë aksesin në mjetet e financimit evropian.
Sakaq, kryeministri grek Kyriakos Mitsotakis kërcënoi hapur se do të bllokonte rrugën e Shqipërisë në BE dhe kërkoi nga qeveria lirimin e Belerit, duke e cilësuar arrestimin skandaloz.
