Viola Sterjo, ish-drejtoreshë e Mjedisit në Bashkinë e Tiranës, u arrestua ditën e sotme nga policia pasi akuzohet për veprën penale “Mashtrimi” me pasoja të rënda.
39-vjeçarja u ka marrë shuma të konsiderueshme parash të paktën 4 personave, të cilëve u premtonte se do të ndërhynte për të fituar projekte ose grante nga AZHBR-ja, duke shfrytëzuar sipas saj njohjet që kishte në politikë.
Shumat që Sterjo ka përftuar, kryesisht në periudhën mars-nëntor 2020 janë të ndryshme dhe variojnë nga 20 deri në 90 mijë euro.
Fillimisht, në 12 dhjetor 2022 në prokurorinë e Korçës ka bërë kallëzim një qytetar nga Korça i cili kishte një pronë në Voskopojë dhe në të donte të ndërtonte një hotel. Ai përmes një të njohuri kishte takuar Viola Sterjon, punonjëse e AKSH-it në atë kohë, e cila i kishte premtuar se do të ndërhynte tek AZHBR për të përfituar një grant.
Fillimisht denoncuesi i ka dhënë Sterjos 57 mijë euro dhe 1.000.000 lekë.
Sakaq, një qytetar nga Pogradeci gjithashtu ka bërë denoncim se i ka dhënë 39-vjeçares sh 9 mijë euro si fillim dhe më pas 28 mijë euro për të ndërhyrë tek AZHBR që të përfitonte një grant prej 1.2 milion euro për të ndërtuar një bujtinë.
Po ashtu në Korçë, një qytetar sipas Prokurorisë i ka dhënë Sterjos 160.000 euro pasi ajo i ka premtuar një grant prej 2.2 milion euro nga AZHBR.
Pas disa muajsh denoncuesi i cili nuk e kishte përfituar grantin i ka kërkuar Sterjos t’ia kthente shumën e lekëve, por ajo i kishte thënë se granti nga 2.2 milionë euro do të shkonte në 4.5 milionë euro.
Një tjetër qytetari nga Korça i cili së bashku me dy ortakë do ndërtonte një resort në Voskopojë, Sterjo i ka marrë 90 mijë euro, duke e mashtruar se kishte bërë aplikim tek AZHBR për ndërtimin e resortit me vlerë 2 milion euro.
Nga shuma prej 90 mijë euro, Sterjo i ka kthyer denoncuesit 20 mijë euro, pasi ky i fundit ishte informuar se në emër të tij nuk ishte bërë asnjë aplikim për të përfituar financim. Me kontratë noteriale Sterjo i njihte detyrimin prej 90 mijë euro dhe nëse nuk ja kthente brenda 6 muajsh do ti linte si garanci banesën e vjehrrit të saj.
