Gjykata e Elbasanit ka shtyrë për të disatën herën gjyqin ndaj Arbër Paplekajt, i cili akuzohet për vrasjen e mjekut Pjerin Xhuvani gjatë fushatës zgjedhore të vitit 2021, kur Grupi i Mbrojtjes së Votës në PD du përplas me grupin e militantëve të PS që blinin vota në qytet.
Seanca e radhës gjyqësore do të zhvillohet në 9 janar, pasi avokatët mbrojtës të të pandehurve kërkuan kohë të njihen me provat e Prokurorisë, duke futur procesin në fazën e shqyrtimit gjyqësor.
Konkretisht ata kërkuan të njihen me listën e dëshmitarëve të ngjarjes, qe deri me tani nuk u është vënë në dispozicion.
Në përfundim të seancës gjyqësore avokatja Rezarta Tahiraj deklaroi: “Jam shumë e kënaqur që trupi gjykues vendosi të aprovojë kërkesën time për t’u krijuar si palë civile edhe bashkëshortja e viktimës. Në këtë betejë, në të cilën përfaqësoj të drejtat e familjarëve të viktimës është e nevojshme që të verifikohet e vërteta në çdo aspekt të saj sepse vetëm kështu mund të bëhet drejtësi e vërtetë”.
Avokatja Tahiraj përfundoi duke pohuar “në këtë proces do të duhet të vlerësohet përgjegjësia e shumë policëve që ishin të pranishëm në vrasje dhe nuk ndaluan që i afërmi i të asistuarve të mi të mos ishte vrarë”.
“Dhe mbi të gjitha duhet të vlerësohet përgjegjësia e atij që atë ditë në Elbasan kishte mbërritur i armatosur me pistoletë dhe vrau mjekun dhe aktivistin politik Pjerin Xhuvani”, shtoi ajo.
Ndërkohë, Prokuroria kërkoi thirrjen në proces të 59 dëshmitarëve dhe të të pandehurit.
Sakaq, Arbër Paplekaj akuzohet për vrasjen e Pjerin Xhuvanit në Elbasan, vetëm pak ditë para zgjedhjeve të përgjithshme.
Konkretisht, më 21 prill të vitit 2021, gjatë një përplasjeje me armë mes dy grupimeve politike mbeti i vrarë Pjerin Xhuvani, ndërsa mbetën të plagosur 4 persona të tjerë mes të cilëve edhe një punonjëse policie.
