Partizani zhvilloi ditën e djeshme stërvitjen e radhës, përpara se të marrë pushimet e Vitit të Ri. Skuadra ishte thuajse e gjitha e pranishme, përveç Xhuliano Skukës.
Nga klubi bëjnë me dije se dibrani ka një ftohje të lehtë dhe kjo është arsyeja përse atij i është dhënë leja para pjesës tjetër të skuadrës, që nesër do të nisë pushimet e fundvitit.
Bekim Rexhepi dje ishte në palestër, pa u stërvitur me pjesën tjetër të ekipit. Gardiani vuan një problem në gju dhe po vijon periudhën e riaftësimit, teksa synimi është rikuperimi për ndeshjen ndaj Vllaznisë.
Nga ana tjetër, Viktor da Silva është kthyer me grupin.
