Ka ndërruar jetë në spitalin e Traumës, 17-vjeçari Elio Hamiti, që u përplas me makinë nga ish-kryebashkiaku i Himarës Vasil Bollano, pasditen e djeshme në Llogara. I mituri nuk ka mundur t’i mbijetojë plagëve të marra pas përplasjes.
Adoleshenti ishte duke kaluar rrugën dhe po shkonte drejt stacionit të autobusit nga fusha e futbollit. Ai u godit me makinë nga ish-kryebashkiaku Vasil Bollano. Sipas dëshmitarëve, goditja ka qenë tepër e fortë dhe i riu është dërguar menjëherë në spital. Por, këtë të Enjte u njoftua se adoleshenti s’mundi të mbijetonte dhe humbi jetën. I mituri ishte nisur të shkonte te gjyshja pasi donte ta shoqëronte atë gjatë natës.
Vasil Bollano ka deklaruar se i riu është hedhur përpara makinës, por duket se ky version nuk i ka bindur ekspertët e policisë të cilët kanë kryer analizën e ngjarjes. Bollano u shoqërua në Komisariat pas aksidentit.
“Rreth orës 17:00, në Llogara, pranë fushës së sportit, shtetasi Vasil Bollano, 66 vjeç, banues në Himarë, duke drejtuar automjetin tip ‘Benz’, ka aksidentuar shtetasin E.H., 17 vjeç, këmbësor në rrugë, i cili ndodhet në spital nën kujdesin e mjekëve. Drejtuesi i mjetit u shoqërua në Komisariat, për veprime të mëtejshme. Grupi hetimor ndodhet në vendngjarje dhe po kryen veprimet e mëtejshme për aksidentin“, njoftoi policia pas aksidentit.
Këtë të Enjte, u konfirmua arrestimi i Bollanos, për veprën penale “Shkelja e rregullave të qarkullimit rrugor” me pasojë vdekjen.
“Specialistët e Qarkullimit Rrugor arrestuan në flagrancë shtetasin Vasil Bollano, 66 vjeç, banues në Himarë. Ky shtetas, ditën e djeshme, rreth orës 17:00, duke drejtuar automjetin, në aksin rrugor Orikum-Llogara, në afërsi të fushës së sportit, ka aksidentuar shtetasin E. H., 17 vjeç, banues në Dukat, i cili lëvizte në këmbë. Si pasojë e dëmtimeve të marra 17-vjeçari ka ndërruar jetë në Spitalin e Traumës, Tiranë. Materialet i kaluan Prokurorisë pranë Gjykatës së Shkallës së Parë Vlorë, për veprime të mëtejshme, për veprën penale ‘Shkelja e rregullave të qarkullimit rrugor’, me pasojë vdekjen”, thuhet në njoftimin e bluve.
