Presidenti Bajram Begaj do takohej sot me kryetarin e bashkisë së Finiqit, Kristo Kiço, pas një vizite në Delvinë, në kuadër të një turi në jug të vendit.
Në momentin që po futej në qytet, eskorta as nuk e ka dalluar fare kryebashkiakun Kristo Kiço dhe vazhdojnë rrugën.
Ky moment është kapur në kamera dhe po shpërndahet kudo në rrjet.
Begaj do të takohet në Finiq edhe me përfaqësues e intelektualë të minoritetit grek, si dhe do të vizitojë edhe Parkun Arkeologjik të Finiqit.
Në Delvinë, Presidenti u takua me Kryetaren e Bashkisë, Majlinda Qilimi për t’u njohur nga afër me sfidat me të cilat përballet komuniteti në këtë zonë si dhe do të takohet me përfaqësues të sipërmarrjeve të vogla e do të vizitojë Muzeun e Historisë.
Në Sarandë, Presidenti Begaj do të takohet me kryetarin e bashkisë, Adrian Gurma si dhe do të vizitojë repartin pediatrik të spitalit “Petro Nako” ku do të takohet e do të bisedojë me stafin e mjekëve. Presidenti dhe Zonja e Parë do të vizitojnë edhe shkollën e mesme “Hasan Tahsini”. Një vizitë do të zhvillohet edhe në Parkun Kombëtar të Butrintit, për të parë bukuritë natyrore të këtij parku – pasuri e mbrojtur e UNESCO-s – që tërheq turistë nga e gjithë bota.
