Presidenti Bajram Begaj ka qenë në Katar disa ditë më parë. Ai është fotografuar brenda një stadiumi, ku luhej një ndeshje gjysmëfinale e kampionatit Botëror. Për vizitën e kreut të shtetit atje nuk ka pasur asnjë njoftim nga institucioni i Presidencës në Tiranë, ndërsa është zbuluar nga një postim në rrjetet sociale i ish-Presidentes së Kroacisë.
Kolinda Grabar-Kitarović, e cila njihet si një tifozë e kombëtares kroate të futbollit, ka qenë pjesë e gjysmëfinales mes Francës dhe Marokut. Faktin e ka bërë me dije vetë ajo përmes një postimi në “Twitter” më 15 Dhjetor, ku ka publikuar edhe disa fotografi. Në një prej tyre, ajo shfaqet krah Presidentit të Shqipërisë Bajram Begaj dhe atij francez, Emanuel Macron.
Kolinda specifikon se data e shkrepjes së fotografive është 14 Dhjetori, kur u luajt gjysmëfinalja mes Francës dhe Marokut, e që përfundoi me triumfin e “gjelave” 2-0.
Doha, 14 DEC, France @equipedefrance vs Morocco @EnMaroc.@HNS_CFF @FIFAWorldCup#FIFAWorldCup #Qatar2022 #FootballUnites #Vatreni #VolimHrvatsku pic.twitter.com/pi9bsUBOHh
— Kolinda Grabar-Kitarović (@KolindaGK) December 15, 2022
Nuk dihet arsyeja e udhëtimit të kreut të shtetit në vendin organizator të Botërorit, ndërsa institucioni i Presidencës është kujdesur ta mbajë të fshehtë vizitën e Begajt në Katar. S’ka asnjë njoftim të shpërndarë për mediat nga zyra e shtypit pranë Presidencës lidhur me këtë vizitë. Mungon po ashtu një sqarim edhe në faqen zyrtare të institucionit. Në rrjetet sociale të Begajt, gjithashtu nuk përmendet udhëtimi i tij në Katar, apo prezenca në një ndeshje Botërori.
