Franca shkoi me meritë në finalen ndaj Argjentinës në Kampionatin Botëror, por të gjithë u befasuan me paraqitjen e “gjelave” të paktën në 60 minutat e para, ku nuk arritën të krijonin thuajse asnjë rast të rrezikshëm.
Pas ndeshjes, ka folur edhe trajneri i nënkampionëve të Botës, Didie Deschamps, i cili ka vlerësuar kundërshtarin për mënyrën sesi e ka menaxhuar atë pjesë loje, ndërsa ka përmendur edhe shqetësimit shëndetësore që kanë pasur lojtarët gjatë ditëve të fundit.
“Ishte një ndeshje e vështirë kundër një kundërshtari me shumë cilësi dhe energji. Nuk luajtëm aq mirë në 60 minutat e para për arsye të ndryshme, pasi na u desh të përballeshim me situata të vështira në katër ditët e fundit si me sëmundjet dhe çështje të tjera kolektive. Pavarësisht gjithë kësaj, ne arritëm të reagonim në një situatë shumë të komplikuar. Është ajo që na bën të ndihemi më keq, sepse mund ta kishim fituar finalen. Ne duruam në kohën shtesë dhe në minutën e fundit ishim gati kampionë”.
Ndërkohë, Deschamps nuk hezitoi të uronte Argjentinën për triumfin. “Nuk duhet të kemi pengje, e urojmë Argjentinën, sepse ka shumë cilësi. Ne nuk i kemi hequr meritat kundërshtarit. Humbja është mizore, sepse ishim pranë fitimit të trofeut. Nuk ka asnjë mënyrë për ta shpjeguar, por ka disa arsye pse nuk bëmë kaq shumë. Na mungonte energjia, sidomos tek disa lojtarë të rëndësishëm, por u përmirësuam me hyrjen e disa lojtarëve me më pak përvojë. Bëmë maksimumin për të fituar, por ëndrra nuk u realizua”, tha trajneri francez.
