Bota e futbollit ndodhet në zi pas lajmit të kobshëm të ditës së djeshme për ndarjen nga jeta në spital të ish-yllit të Seria A, serbit Sinisa Mihajloviç.
Por një tjetër lajm i rëndë ka ardhur, këtë herë nga Zvicra, ku njoftohet se ka ndërruar jetëë futbollisti Elia Alessandrini, ish-lojtari i Young Boys dhe lojtari aktual i Lausanne-Ouchy.
25-vjeçari është ndarë nga jeta tragjikisht gjatë pushimeve të tij, siç konfirmoi të shtunën në mëngjes liga elitare zvicerane.
Alessandrini, i cili në karrierën e tij ka luajtur për FC Thun, Chiasso dhe SC Kriens, tërhoqi vëmendjen në moshën 15-vjeçare kur luante në “Stade de Suisse” në një ndeshje përballë me Lionel Messin.
“Ai ndoshta mendoi se isha zëvendësues”, kishte thënë Alessandrini në atë kohë duke qeshur. “Në fakt, nuk duhej të më lejonin në fushë. Por, nuk doja të humbisja mundësinë për të takuar Messin”.
Tronditja e vdekjes së 25-vjeçarit në Zvicër është e madhe. SC Kriens shkruan të premten në mbrëmje: “Ne jemi të tronditur, të habitur dhe vajtojmë për Elia Alessandrinin. Ish-shoku ynë i skuadrës, kapiteni dhe miku ynë deri më sot. Mendimet tona janë me familjen dhe miqtë e tij. U prehsh në paqe i dashur Elia”.
Lausanne-Ouchy gjithashtu raportoi në rrjetet sociale për vdekjen e lojtarit të tyre: “Kapiteni me trup dhe shpirt, familja kuqeblu mban zi për Elia Alessandrinin. Familja humbet një mik, një shok skuadre dhe një model për të gjithë”.
