Vrasësi i 49-vjeçarit, Edmond Papa priti për disa minuta viktimën, vetëm disa metra larg lokalit ku kreu ekzekutimin.
Burime nga grupi hetimor bëjnë me dije se biznesmeni, pronar i një hoteli të njohur në Sarandë ka mbërriturrreth orës 15:00 në banesën e të vëllait të tij dhe afro 1 orë me pas është drejtuar për në bar kafenë ku u vra.
Viktima është ulur në pjesën e jashtme të bar kafesë, teksa autori futet disa minuta pas tij dhe hap zjarr, siç tregohet në këtë grafik 3D të ndërtuar nga Tv Klan, bazuar në të dhënat e siguruara nga grupi hetimor.
Edmond Papa ka tentuar të futet në ambjentet e brendshme të lokalit, por nuk ka mundur.
Pasi ka qëlluar për të pakën 7 herë objektivin, autori është larguar në këmbë me shpejtësi.
Ai përshkron për disa metra trotuarin e rrugës Fadil Bodinaku dhe më pas futet në një rrugicë.
Lëvizjet e autorit, i cili dyshohet të jetë paguar për vrasjen, janë fiksuar nga kamerat e sigurisë në zonë. Një kamera ka qenë e fiksuar edhe në pjesën e jashtme të lokalit. Vrasësi ka qenë i veshur me tuta dhe bluzë të zezë dhe në kokë mbante një kapuç për të mos u identifikuar.
Hetuesit thonë se autori i ka ruajtur prej kohësh lëvizjet e biznesmenit, i cili prej paradites së të premtes kishte ardhur nga Saranda ku banonte, në Tiranë për të vizituar nëspital nënën e tij. Në ndjekje të viktimës, vrasësi mund të ketë pasur edhe bashkëpunëtorë të tjerë.
E shkuara kriminale e viktimës në fushën e narkotikëve, si brenda dhe jashtë vendit, si dhe ndonjë konflikt i kohëve të fundit janë pistat ku po heton policia për zbardhjen e ngjarjes.
Gjithashtu në pyetje për vrasjen janë marrë dhjetra persona, por deri në këtë fazë të hetimit ende asnjë gjurmë nga autori.
/Tv Klan/
