Skandali i lidhjeve korruptive mes figurave të larta politike të Europës dhe Katarit përfshinë dhe ish-Presidentin francez Nikolas Sarkozi.
E përditshmja Le Monde shkruan se Sarkozi është në qendër të një hetimi të nisur nga Prokuroria financiare franceze për korrupsion në përzgjedhjen e Katarit si vend për zhvillimin e Botërorit të këtij viti, ku mund të jenë përfshirë edhe politikanë të tjerë vendas.
Afera, sipas Le Monde, nis që me drekën e famshme të 23 Nëntorit 2010 në Pallatin Elize, ku Sarkozi në atë kohë President ftoi Tamim bin Hamad al-Thanin, emirin e ardhshëm të Katarit. Dreka u zhvillua 3 javë para se Franca të jepte mbështetje për Botërorin 2022 në Katar.
Në këmbim të investimeve që Botërori solli për zhvillimin e vendit të vogël të Gjirit Persik, marrëveshja e dyshuar Sarkozi – Al Thani parashikonte blerjen nga Katari të PSG, kontrata prej miliona Eurosh për blerjen e armëve franceze, etj. Po ashtu, Katarit i jepej akses i gjerë përmes Francës në botën e financave, sipërmarrjes, sportit e hotelerisë. Ka dyshime të forta se në 10 vite, në Katar mbi 15 mijë të huaj kanë vdekur nga kushtet skandaloze të punës në të zezë për ndërtimin e infrastrukturës sportive të Botërorit 2022.
Vitin e kaluar, Nikolas Sarkozy u dënua me 1 vit burg dhe 2 të tjera me liri të kufizuar për kapërcim me gati dyfish të kufirit të fondeve të fushatës së dështuar për rizgjedhjen si President i Francës në 2012.
“Miku i çmuar i Ramës”
Ish-Presidentin francez Nikolas Sarkozi ka një lidhje të ngushtë me kryeministrin shqiptar Edi Rama. Të paktën kështu ka deklaruar në mënyrë të përsëritur ky i fundit, ndërsa mes të dyve janë zhvilluar takime, për të cilat Rama ka njoftuar edhe publikisht.
Në 21 Qershor 2019, Rama do priste Sarkozinë në një vizitë në zyrën e tij. Teksa shpërndau në rrjetet sociale pamje nga takimi, Rama e cilësoi ish-Presidentin “një mik të çmuar” – “Me mikun e çmuar, Presidentin Nicolas Sarkozy, në selinë e Kryeministrisë”, shkruhet në postimin e shpërndarë në FB-në e kreut të qeverisë.
Pas takimit, sipas raportimeve mediatike, kryeministri Edi Rama dhe Sarkozy u nisën drejt Butrintit me helikopter, ku bashkëshortja e këtij të fundit, kantautorja dhe modelja Carla Bruni, mbajti një koncert.
Në vitin 2021, Rama do ta vizitonte Sarkozinë në shtëpinë e këtij të fundit në Francë.
“Me një mik special në shtëpinë e tij në Paris, presidentin Nicolas Sarkozy, me të cilin kam privilegjin të këshillohem për sfidat e Shqipërisë dhe rajonit tonë, në rrugën e zhvillimit ekonomik e social, e të integrimit europian”, do të shkruante Rama në një tjetër postim në FB, ku shpërndante foto teksa pozonte me Sarkozinë.
Rama teksa pozon me ish-Presidentin francez Sarkozi
