Nga Boldnews.al
Bashkia e Tiranës ka shpallur një tender me vlerë 210 milionë lekë të reja ose rreth 2 milionë euro, për rikualifikimin urban të zonës “Kodra e Diellit”, në Tiranë.
Për shumë banorë të kryeqytetit, kjo zonë njihet edhe si “lagja e pasanikëve”. Ajo gjendet në pjesën mbi Kopshtin Botanik dhe është zhvilluar kryesisht pas viteve 2000, me pallate të reja dhe strukturë organizative të rregullt.
Prej disa vitesh, aty jeton edhe vetë kryetari i Bashkisë së Tiranës, Erion Veliaj.
Kompleksi rezidencial ka hyrje ekskluzive vetëm për banorët e saj, të cilët përdorin çelëse të posaçëm për të hapur traun e zonës.
Lagja “Kodra e Diellit”, për nga mënyra e organizimit, ngjan thuajse identike me komplekse të tjera rezidenciale private, në pjesën periferike të Tiranës.
Për të kuptuar vlerën e këtij kompleksi, mjafton të përmendet se çmimi i apartamenteve aty nis nga minimum 1600 euro për metër katror, një shifër shumë e lartë për shumicën absolute të qytetarëve shqiptarë.
Por, edhe kjo zonë, sipas kryebashkiakut Veliaj, ka nevojë për investime të reja. Për të zbuluar problematikat infrastrukturore, Bashkia e Tiranës ka kontraktuar ekspertizën e studios “Atelier 4”, në pronësi të Alban Eftimi, një prej miqve më të ngushtë të kryeministrit Edi Rama.
Në dokumentat e tenderit thuhet se disa akse rrugore dhe trotuaret në krah të tyre kanë nevojë për ndërhyrje emergjente, pasi janë në gjendje të degraduar.
Por, ky shpjegim teorik, shoqërohet me disa foto, në të cilat gjendja e infrastrukturës, jo vetëm nuk është e dëmtuar, por, përkundrazi, është shumë herë më e mirë se pjesa më e madhe e qytetit të Tiranës.
Po ashtu, në dokumentat e tenderit thuhet se zona e “Kodrës së Diellit” ka nevojë për sistemim për kanalet e ujërave të zeza dhe ujërave të shiut.
Banorët që jetojnë në këtë kompleks nuk janë përballur asnjëherë me vështirë të kësaj natyre dhe një verifikim i thjeshtë në terren, i kryer nga “Boldnews.al”, dëshmon se kanalizimet janë në gjendje normale dhe se nuk konstatohen rrjedhje sipërfaqësore të ujit.
Megjithatë, Veliaj ka vendosur të shpenzojë plot 2 milionë euro për rikualifikimin e zonës.
Mesa duket, ai, si një banor i lagjes luksoze, duhet të ketë vënë re me detaje problematikat e “Kodrës së Diellit”.
