Deputetja e PD-së, Jorida Tabaku shprehet se Shqipëria sipas të dhënave është vendi me të ardhurat për frymë më të ulëtat në rajon. Ajo shton se të ardhurat për frymë të Shqipërisë janë sa 32% e mesatares Europiane me një diferencë jo të vogël në raport me vendet e rajonit.
Tabaku thekson se qeverisja e kryeministrit Rama ka bërë që shqiptarët të jenë më të varfrit në rajon, duke pasur më pak të ardhura nga të gjithë dhe duke konsumuar rrjedhimisht më pak.
Ajo shtoi se gjendja ekonomike në Shqipëri mund të ndryshojë vetëm nëse ndryshon sistemi i taksimit dhe nëse zbatohet tregu i lirë, i cili sot është një mbretëri oligarkike.
Reagimi i plotë:
Si e varfërojnë socialistët familjen shqiptare
Të ardhurat për frymë të familjeve shqiptare janë më të ulëtat në raport me rajonin ndërkohë që qeveria takson më shumë konsumin e qytetarëve dhe padyshim punën e tyre.
Përballë shifrave që nga viti në vit tregojnë varfërimin ekstrem të shqiptarëve dhe familjeve të tyre, qeveria vazhdon të këmbëngulë në skemat e taksimit për shtresën e mesme.
Të ardhurat për frymë të Shqipërisë janë sa 32% e mesatares Europiane me një diferencë jo të vogël në raport me vendet e rajonit. Maqedonia e Veriut ka të ardhruat për frymë 38% të mesatares Europiane, Serbia sa 44% ndërsa Mali i Zi 48%.
Konsumi, siç edhe pritej është në kuotat minimale duke qenë se edhe të ardhurat janë më të ulëtat. Shqiptarët konsumojnë 39% të mesatares së BE ndërsa vendet e rajonit konusmojnë 49% të mesatares së BE.
Shqiptarët janë qytetarët më të varfër në rajon, konsumojnë më pak dhe kanë më pak të ardhura. Binomi i varfërisë dhe mjerimit që thellon pabarazinë!
Si mund të ndryshojë? Shqipëria duhet të ndryshojë sistemin dhe mënyrën e taksimit, duhet të zbatojë tregun e lirë që sot është mbretëria e oligarkisë.
Pa ndryshuar këtë qasje Shqipëria nuk mund të zhvillojë asnjëherë potencialin dhe oportunitetet që ka. Koha është mendojmë për shqiptarët! Koha është të ndërtojmë Europën këtu!
