Në një kohë kur Këshilli i Lartë i Prokurorisë po zhvillon mbledhjen ku do të zgjidhet kreu i ri i Prokurorisë së Posaçme (SPAK), ambasadorja amerikane Yuri Kim ka zhvilluar një vizitë në Kryeministri.
Vizita e Kim ka zgjatur përreth 1 orë, me eskortën e ambasadores së SHBA që është parë të largohet gjatë kohës që në KLP kishte nisur prezantimi i kandidaturave dhe ishte duke folur prokurori Adnan Xholi.
Nuk dihet ende se me kë është takuar diplomatja amerikane në Kryeministri, por është fakt që në 2-3 javët e fundit ka pasur një përplasje të ashpër me deklarata në distancë midis Kim dhe kryeministrit Edi Rama, me krisjen në raportin e tyre që besohet se ka lindur për garën për drejtuesin e ri të SPAK.
Sakaq, KLP do të zgjedh sot midis 3 kandidatëve – Adnan Xholi, Altin Dumani dhe Edvin Kondili, prokurorin që do të marrë në dorë “timonin” e organit të akuzës për një mandat 3 vjeçar.
Altin Dumani dhe Edvin Kondili hyjnë në këtë garë për herë të dytë, pasi tre vite më parë ishin konkurrentët kryesor përballë kreut aktual të SPAK, Arben Kraja.
