Një vrasje me armë zjarri ka ndodhur pasditen e kësaj të Premteje në kryeqytet, në zonën e Selitës.
I vdekur ka mbetur Edmond Papa 49 vjeç, biznesmen nga Saranda.
Autori, pas krimit, ka arritur të arratiset, ndërsa mbetet i panjohur për policinë.
Papa u qëllua disa herë me armë zjarri teksa ndodhej në një lokal, pranë banesës së vëllait të tij. Nga të shtënat, ai mbeti i plagosur dhe u transportua për në spitalin e Traumës. Por, nuk arriti të mbijetojë.
Krimi ndodhi rreth orës 16.30, në rrugën ‘Fadil Bodinaku’.
“Në lokalin në pronësi të shtetasit V.Sh., një person ende i pa identifikuar ka qëlluar me armë zjarri pistoletë shtetasin E.P., 49 vjeç, i cili si pasojë e plagëve të marra ka ndërruar jetë në spital”, thuhet në një njoftim paraprak të policisë së Tiranës lidhur me ngjarjen.
Në vendin e ngjarjes ndodhet grupi hetimor dhe po punon për sqarimin e rrethanave të ngjarjes dhe identifikimin e autorëve, ndërsa shërbimet e Policisë po vijojnë kontrollin e zonës për të bërë të mundur kapjen e autorit, shtojnë të njëjtat burime.
Pas krimit, autori që sipas dëshmive ishte me kapuç dhe i veshur me të zeza, dyshohet se eci në këmbë, për të vijuar më tej arratisjen me një automjet.
Në momentin e atentatit, viktima e ka pikasur autorin dhe ka tentuar t’i përgjigjet me mjete rrethanore që i gjendeshin te tavolina ku ishte ulur. Sipas dëshmitarëve, Papa e ka qëlluar me tavëll por kjo nuk e ka penguar autorin të zbrazë breshëri plumbash ndaj tij.
Shefi i komisariatit nr. 2 në Tiranë, në një prononcim nga vendngjarja për gazetarët tha: “Ngjarja ndodhi në një biznes privat, ëshë qëlluar ne drejtim të shtetasit Edmond Papa, banor në Sarandë, ndërroi jetë në spitalin e Trauëms në Tiranë. Policia ka marrë masat për zbardhjen e ngjarjes. Policia është duke hetuar”.
Edmond Papa rezulton të jetë biznesmen në fushën e turizmit. Sipas të dhënave në Qendrën Kombëtare të Biznesit, 49-vjeçari është pronari i hotelit “Blue Sky” në Sarandë.
Përbri lokalit ku u qëllua, viktima kishte parkuar mjetin e tij luksoz tip ‘G-Class’
Edmond Papa, raportohet se kishte mbërritur sot në Tiranë, ndërsa vitet e fundit ishte zhvendosur në Mbretërinë e Bashkuar. Për krimin e rëndë, policia ka ngritur dy pista kryesore që lidhen me skedimet e viktimës në Angli për trafikim lëndësh narkotike dhe një me ndonjë konflikt të mundshëm, pikërisht për këtë lloj aktiviteti të paligjshëm. Ai është dënuar edhe në shtetin grek me 7 vite burg për trafikim droge. Po hetohen dhe bizneset e Papës në qytetin e Sarandës ku ai merrej me ndërtime dhe rezulton pronar i një hoteli.
