Një djalë 6-vjeçar është bërë fëmija i katërt që ka ndërruar jetë pasi ra në një liqen të ngrirë në Solihull të Mbretërisë së Bashkuar.
Vogëlushi u dërgua me urgjencë në spital dhe ndodhej në gjendje kritike për jetën ndërsa sot policia ka konfirmuar vdekjen e tij.
Sky News raporton se policia e West Midlands gjatë një deklarate ka thënë: “Me pikëllim të thellë duhet të raportojmë këtë pasdite se 6 vjeçari në spital ka humbur luftën për jetën. Ngushëllimet tona më të thella janë me familjet dhe miqtë e të përfshirëve në këtë tragjedi.”
Vdekja e tre fëmijëve të tjerë, 8, 10 dhe 11 vjeç, u njoftua të hënën. Mediat e huaja kanë raportuar se fëmijët po luanin në liqenin e ngrirë ku njëri prej tyre ra në ujë.
Ndërsa tre të tjerët u përpoqën ta ndihmonin, të gjithë ranë dhe pavarësisht se u dërguan në spital, nuk mbijetuan dot.
