Mediat britanike kanë publikuar vendin ku është fundosur gomonia me mbi 35 emigrantë të paligjshëm që po tentonin të kalonin kanalin gjatë natës nga Franca në Britaninë e Madhe. Nuk dihet nëse ka edhe emigrantë shqiptarë në gomonen që është përmbysur në mes të Kanalit rreth orës 03:40 të mëngjesit kur temperatura ka zbritur sipas mediave britanike në -3 gradë celcius.
Një operacion shpëtimi është duke u zhvilluar momentalisht. Siç shihet nga harta, në këto momente shumë anije shpëtimi po kërkojnë për viktima dhe të mbijetuar.
The Sun raporton se dyshohet të ketë viktima, por nuk është konfirmuar ende nga autoritetet.
“Rojet bregdetare aktualisht po koordinojnë operacionin pas incidentit të një varke të vogël jashtë Kentit, duke punuar me Marinën, Forcën Kufitare, Policinë e Kentit dhe partnerë të tjerë”, njoftoi një zëdhënës i Agjencisë Detare britanike.
Ai shtoi: “Ne kemi dërguar varkat e shpëtimit Dover, Dungeness, Hastings dhe Ramsgate RNLI dhe ekipet e shpëtimit të rojës bregdetare Deal, Dungeness dhe Folkestone, së bashku me komandantin e zonës së rojes bregdetare”.
Anijet e përfshira në kërkim përfshijnë dy varka shpëtimi RNLI, varkën patrulluese të Marinës Mbretërore HMS Severn, dy anije peshkimi dhe një patrullë të rojes bregdetare franceze.
