Katër shqiptarë të cilët u kapën në një shtëpi bari në zonën e Neath në Mbretërinë e Bashkuar, janë sënuar me 3 vite burg. Sipas mediave të huaja, ata do të vuajnë vetëm gjysmën e dënimit, ndërsa pjesën tjetër do të angazhohen në punë në komunitet.
Efektivët e policisë shkuan në këtë banesë, pasi ishin në kërkim të një personi, për një çështje që nuk kishte lidhje me drogën. Ata trokitën në derë, ku u përgjigj shtetasi Elton Musta. Pasi i shpjeguan arsyen pse ishin aty, oficerët u futën brenda.
Në këtë moment, një tjetër shtetas shqiptar i identifikuar si Ledian Xhafa, u hodh nga dritarja e katit të dytë të shtëpisë dhe tentoi të arratisej, por u ndalua nga ana e oficerëve të policisë. Nga kontrollet e ushtruara, efektivët gjetën disa qese me kanabis, telefona celularë dhe një shumë të konsiderueshme parash. Në telefonat e dy të arrestuarve, u gjetën mesazhet e tyre që kishin me dy shqiptarë të tjerë.
Por, dy të rinjtë kishin edhe fotografi e video nga shtëpia e barit ku kultivonin lëndën narkotike, një provë kjo e pakundërshtueshme në gjykatë. Njëri nga telefonat përmbante edhe imazhe të faturave dhe kostove për blerjen e pajisjeve që lidhen me rritjen e kanabisit që shkonte në disa mijëra paund – megjithatë nuk dihet se çfarë ka ndodhur me ato artikuj.
Efektivët i dërguan në komisariat dy shqiptarët, teksa një pjesë qëndruan në shtëpi, pasi dyshonin se në këtë aktivitet kriminal kishte dhe persona të tjerë të përfshirë. Më pas, në banesë mbërritën Renato Shyti dhe Lorenc Cobo të cilët u arrestuan menjëherë. Elton Musta, 29 vjeç, Ledian Xhafa, 35 vjeç dhe Lorenc Cobo 37 vjeç, të gjithë nga Payne Street, Melin, Neath dhe Renato Shyti, 23 vjeç, nga Ëest Street, St Phillips, Bristol, ishin kapur edhe më herët për trafikim të lëndëve narkotike, por ndaj tyre nuk kishte asnjë dënim.
