Kryetari i Partisë Demokratike, Sali Berisha foli sot për sulmin ndaj tij në 6 dhjetor duke e cilësuar sërish si një akt të urdhëruar nga kryeministri i vendit Edi Rama.
Berisha u shpreh se vendi ynë është shndërruar në “Republikë Bananesh”, duke theksuar se Rama synon asgjësimin e forcës opozitare më sovrane.
“Unë e kam falë Gert Shehun por nuk fal kurrë PD-në, ky është problemi. Edi Rama do të zhdukë PD-në, asnjëri prej nesh nuk ka autoritet të pranojë t’i dorëzojë një armiku të egër partinë, këtë ne nuk mund ta bëjmë. Ne nga 11 Dhjetori deri më sot jemi angazhuar në procesin më legjitim, më të ndershëm e transparent. Faktikisht Partia e Demokratike është lokomotivë e lirisë sot sepse anëtarët e saj kanë bindje të plotë e të thellë tek dashuria e patriotizmi i tyre për vendin pa të cilin forca jonë politike nuk mund të ekzistojë. Ne u përballëm në këtë periudhë, me një piramidë të tmerrshme mashtrimi, gjigande. U përballëm në këtë periudhë ndoshta si rrallë ndonjëherë me ndërhyrje brutale kundër vullnetit të demokratëve. Të gjithë ata që u angazhuan marrin për vete turpin, çfarëdo që janë”, tha Berisha gjatë fjalës së tij në mbledhjen e Kryesisë së Partisë Demokratike.
“Demokratët qëndruan! Ata qëndruan, ja ku janë, 55 mijë dolën në votim, me gjithë këto presione dhe përpjekje. Për çfarë?! Sepse duhet që PD të ishte fasadë e Edi Ramës, pavarësisht se kjo është forca më e përkushtuar e vokacionit perëndimor shqiptar. Kjo është e vërteta, por çfarë është opozita për Edi Ramën? Sot e ka të qartë çdo shqiptar. Por kurrë ndonjëherë nuk do mbrojmë idealet dhe parimet në rast se nuk i themi gjërat siç janë, është kusht themeltar. Jemi në një betejë, të vështirë pa diskutim, por kjo betejë nuk zgjidhet kurrë duke pranuar nëpërkëmbjen në mënyrën më të padenjë dhe vetëm e vetëm se Edi Rama është peng i dosjeve të tij. Kjo është një republikë bananesh’, kjo është një republikë bananesh, ky është një turp”, shtoi ai.
