Franca është finaliste e Botërorit të Katarit, pasi triumfoi 2-0 ndaj Marokut, në Al Bayt Stadium (Al Khor). “Gjelat” do të kalonin shumë shpejt, në avantazh që në minutën e pestë. Theo Hernandez me një lëvizje të bukur akrobatike ndez festën në stadium, duke të dhënë idenë se për të besuarit e Didier Deschamps, sfida do ishte e lehtë.
Nuk ndodh kështu. Marokenët, me shumë dëshirë për të luajtur dhe për të bërë mirë, i afrohen disa herë golit të barazimit brenda fraksionit, por pa fat dhe me një Hugo Llogris fantastik, nuk pati ndryshim rezultati.
Në pjesën e dytë, ekipi i Regraguit rrit akoma më shumë presionin, sposton kundërshtarin në gjysmëfushën e vet, por sërish nuk tregohen shumë të saktë para porte. Konate shpëton Francën nga goli, duke larguar një top nga fare pranë portës. Goli i sigurisë do vinte në minutën e 80-të nga Kolo Muani, ndërsa ndeshka nuk do të kishte më histori deri në vërshëllimën përfundimtare të arbitrit.
FRANCE-MAROK | GOLAT E SFIDES VIDEO
Kjo është finalja e dytë rresht dhe e katërta në 24 vitet e fundit në Kupën e Botës për “Gjelat” ku do të kërkojnë trofeun e tretë të historisë për t’u rreshtuar pas Brazilit, Gjermanisë dhe Italisë.
Franca do të përballet në finalen e Botërorit me Argjentinën, ndeshje kjo që do luhet me 18 dhjetor, ora 16:00. Do të shohim një përballje të fuqishme, një finale të mrekullueshme, ku Messi dhe Mbappe do të luftojnë për të çuar kombet e tyre përkatëse drejt ngritjes së trofeut më të rëndësishëm në botë për një lojtar apo komb.
Bilanci i ndeshjeve të mëparshme mes dy skuadrave
2018 (Kupa e Botës) Francë-Argjentinë 4-3
2009 (Miqësore) Francë-Argjentinë 0-2
2007 (Miqësore) Francë-Argjentinë 0-1
1986 (Miqësore) Francë-Argjentinë 2-0
1978 (Kupa e Botës) Argjentinë-Francë 2-1
1977 (Miqësore) Argjentinë-Francë 0-0
1974 (Miqësore) Francë-Argjentinë 0-1
1972 (Miqësore) Francë-Argjentinë 0-0
1971 (Miqësore) Argjentinë-Francë 2-0
1971 (Miqësore) Argjentinë-Francë 3-4
1965 (Miqësore) Francë-Argjentinë 0-0
1930 (Kupa e Botës) Argjentinë-Francë 1-0
