Në gjithë vendin ka filluar shpërndarja e bonusit prej 5000 lekësh të reja për rreth 700 mijë pensionistët, në bazë të vendimit të Qeverisë.
Pavarësisht se kryeministri Edi Rama del dhe krenohet në çdo konferencë për mediat për lëshimin e këtij bonusi në kohë krize, pensionistët duket se janë të pakënaqur nga shuma e akorduar nga qeveria.
“Ne i morën dhe i harxhuam. Çfarë do marrim me 50 mijë lekë. Kanë shkuar shumë shtrenjtë gjelat e detit në Tiranë. Kushtojnë 70 mijë lekë. Unë nuk jam pensionist akoma, pasi punoj në tregti, në Pazarin e Vjetër të Krujës”, shprehet një prej tyre për TCH.
Duket se kryeministri është shkëputur nga realiteti i përditshëm dhe nuk njeh as shifrat e INSTAT-it të kontrolluar prej tij, që për muajin nëntor bëri me dije se inflacioni po rrezikon të arrijë në nivelet e vitit të mbrapshtë ’97.
Pikërisht kjo rritje e frikshme e çmimeve, që në periudhë festash bëhet edhe më abuzive, e të cilën Rama nuk e sheh, ka bërë qytetarët të shprehen të shqetësuar, duke nënvizuar se 5 mijë lekët nuk i mjaftojnë as për të blerë një gjel për mbrëmjen e ndërrimit të viteve.
“Është shumë pak. As gjelin nuk e blen dot. Në jemi 8 vetë në familje, nuk na del. Ato 5000 mijë lekë do ja jap ndonjë nipi të vijë të lozi në lodrat në qendër”, thotë një pensionist në Tiranë.
Ndërkohë një tjetër pensionist deklaron se do të ndihmojë fqinjët e tij që gjenden në gjendje më të të rënduar financiare.
“Pak janë, por sipas mundësive. Po ku kapet dot gjeli i detit, bën shtrenjtë. Unë do t’i dhuroj tek komshinjtë e mi, që janë të varfër. Le të gëzojnë edhe ata”.
Sakaq ka edhe nga ata qytetarë që kërkojnë një shifër më realiste bonusi nga qeveria, që do të përllogaritej në 100 mijë lekë të vjetër.
“Një shishe vere mund të blesh. Duke qenë se të ardhurat vendore janë dyfishuar siç thonë, le ta bënin 100 mijë lekë bonusin”, thanë qytetarët në kryeqytet.
