Në një konferencë për mediat mesditën e sotme kreu i Partisë së Lirisë, Ilir Meta ka adresuar problemin e skemës së Partneriteti Publik-Privat që sipas tij ka rënduar ndjeshëm buxhetin e shtetit.
“Buxheti i shtetit është renduar ndjeshëm dhe borxhi publik është rritur. FMN sikundër edhe opozita kanë paralajmëruar për nivelin e lartë të rrezikut që paraqesin kontratat koncensionare. Këto praktika të dëmshme për ekonominë e vendit, po bëhen shkak për të krijuar detyrime të mëdha që do të minojnë qëndrueshmërinë e borxhit. Këto kontrata koncensionare që zënë 40 % të produktit të brendshëm bruto, nënkupton një gropë ku pritet të zhduken miliona euro të taksave shqiptare”, u shpreh ai.
Duke ju referuar një thirrje të FMN-së për qeverinë shqiptare që të ndalë praktikat PPP në tenderimin e punëve publike dhe ngritjen e alarmit mbi paratë e pista që po futen në ekonomi përmes sektorit të ndërtimit e tregut të pasurive të paluajtshme, Meta tha se po rrezikohet stabiliteti financiar i vendit.
“Mbështes thirrjen e FMN. Qeveria të bëjë transparente përdorimin e fondeve aq më tepër që jemi para fakteve tronditëse, ende sot ka qindra familje që nuk janë futur në shtëpitë e tyre dhe janë të braktisura nga shteti. Ndërtimi dhe tregu i pasurive të paluajtshme ka marrë vëmendje të lartë. Mbështes shqetësimin e FMN ndaj stabilitetit financiar”, deklaroi kreu i PL.
