Pas fitores me Bylisin, ku u duk se skuadra bëri autokritikë, Partizani u kthye pas pauzës me një barazim dramatik ndaj Erzenit me shifrat 3-3. Ishte një ndeshje me tri fytyra për të kuqtë, të cilët pësuan që në minutat e para, më pas e kthyen ndeshjen dhe në fund bënë dy gabime amatore dhe u dhuruan barazimin shijakasve.
Gjithsesi, përveç rezultatit zhgënjyes, që i shkëputi me dy pikë nga Tirana kryesuese, Partizanit i duhet të përballet me dëmtime të tjera, që në këtë vit e kanë penguar skuadrën të krijojë një bosht solid dhe të shmangë luhatjet kaq të shumta në lojë dhe rezultate. Ndaj shijakasve Engjëll Hoti shfaqi probleme, teksa edhe Matondo u zëvendësua prej shqetësimeve muskulore. Ndërkohë, Bruno Telushi nuk u grumbullua fare për këtë sfidë, pasi nuk ishte stërvitur për dy ditë me ekipin.
HOTI – Fantazisti u aktivizua nga stoli ndaj shijakasve, por luajti shumë pak, sepse shfaqi probleme dhe doli nga fusha duke çaluar. Madje në momentin kur nisën reshjet e mëdha të breshrit, “Dardani” nuk mundi të vraponte, por e hëngri gjithë stuhinë mbi shpinë, teksa u shoqërua nga arbitri dhe mjekët e të kuqve drejt dhomave të zhveshjes. Ditën e sotme ai pritet të kryejë vizitat mjekësore për të mësuar shkallën e dëmtimit, por e sigurt është se do të mungojë në ndeshjen ndaj Kukësit të enjten. Ish-mesfushori i Tiranës ka pasur probleme të shumta fizike në këtë sezon, që duket se nuk po i buzëqesh për sa i përket këtij aspekti. Hoti nuk është paraqitur në stërvitje ditën e djeshme.
MATONDO – Kongolezi u kthye në fushë si titullar që nga dëmtimi i tij më 30 tetor ndaj Egnatias, por edhe ditën e djeshme ai shfaqi shqetësime muskulore dhe iu desh të linte fushën e lojës i dëmtuar. Gjithsesi, mësohet se ai nuk ka probleme të mëdhadhe mjekët po bëjnë maksimumin për ta rikuperuar për ndeshjen me Kukësin, por nuk mund të thuhet me siguri nëse ai do të luajë ndaj verilindorëve. Në ditët në vijim do të shihet ecuria e kongolezit. Nga ana tjetër Da Silva vijon të mos stërvitet me grupin dhe as në ndeshjen ndaj Kukësit nuk do të jetë në fushë. Mungesat e sigurta të tij dhe Hotit e vënë jo pak në vështirësi trajnerin Kolela në lidhje me ndërtimin e formacionit. Ndërkohë, shpresohet që ata të jenë gati për derbin e 21 dhjetorit.
