Nga Boldnews.al
Bashkitë janë vënë në “garë” me njëra-tjetrën për asfaltin elektoral. Muajt e fundit, dhjetëra bashki kanë bërë tendera për mbushje gropash, aq sa kanë shpenzuar miliona euro. Nga Sako e Durrësit, Veliaj i Tiranës, Ndreu i Lezhës, Llatja i Elbasanit, Gjici i Kukësit, por edhe shumë të tjerë kanë finalizuar këto tendera, të cilat në fakt nuk kanë qellim që të mbushin gropat, por për t’iu hedhur “hi syve” zgjedhësve.
Por, përse kujtohen tani, aq më tepër kur jemi disa muaj para zgjedhjeve lokale? Apo tani kujtohen për popullin, pasi vitet e mëparshme në krye të bashkisë i kanë përdorur për “të mbushur xhepat”. Pas emrave të mësipërm, një tjetër i është bashkuar “klasës”, bëhet fjalë për Sotiraq Filon e Korçës, i cili njihet më së shumti si “Raqka”.
Pikërish Raqka, sipas dokumentit të mësipërm, ka finalizuar tenderin për asfaltin elektoral, i cili po përdoret rëndom nga të zgjedhur vendor. Asfalti është bërë lajmotiv i këtyre zgjedhjeve, pasi “e ndritën” me gjëra të tjera. Por, nuk mbeten prapa as premtimet e “ujit” apo “të dritave”, të cilat na kanë shoqëruar këto 30 vitet e fundit në demokraci.
Sipas dokumenteve që disponon BoldNews.al, Bashkia e Korçës hapi disa muaj më parë tendering me objekt “investime në infrastrukturën rrugore”, me një fond rreth 108.333.333 lekë, ose mbi 1 milionë euro. Afati i kryerjes së këtyre investimeve është 12 muaj.
Ofertën më të vogël e ka pasur firma “Kevin Construksion” me vlerë 68.249.990 lekë pa TVSH. Oferta e dytë ka qenë firmës “Almo Konstruksion” me vlerë 73.074.183 lekë pa TVSH, e cila është shpallur edhe fituese. Pro, oferta ka qenë rreth 5 milionë lekë të rinj më shumë sesa oferta e parë, por Raqkës së Korçës nuk i kanë hyrë shumë në sy dhe e ka skualifikuar firmën që ofroi më pak!
BoldNews.al shfletoi dokumentet e tenderit, ku rezulton se këto para’ do të shpenzohen për asfalt. “Nisur nga problematikat e dala nga takimet për Buxhetin me pjesëmarje në qytetin e Korçës si dhe në Njësitë Administrative të bashkisë, stafi i DPKZHT ka bërë të mundur të bëjë verifikimin në terren të disa prej akseve rrugore, të cilat janë me problematikë për banorët dhe qarkullimin e automjeteve.
Pas rikonjicionit në terren të këtyre akseve rrugore është konstatuar se në disa segmente të këtyre akseve, shtresat rrugore janë të dëmtuara. Gjendja teknike e shtresave rrugore në këto segmente është jashtë standartit dhe lëvizja e automjeteve bëhet me vështirësi” thuhet në këto dokumente.
Sipas tyre, në shumë raste dëmtimet e shtresave rrugore janë deri në thellësi, në të cilat janë krijuar gropëzime dhe çedime të konsiderueshme, të cilat në raste të veçanta këto dëmtime bëhen shkak edhe për aksidente serioze në këto akse rrugore. “Parashikohet përmirësimi i shtresave asfaltike dhe në raste të veçanta edhe përmiresimi i nënshtresave rrugore në disa prej akseve rrugore, të cilat konsiderohen të rëndësishme dhe me prioritet” thotë Bashkia e Korçës. Por, tani para zgjedhjeve i panë këto gropa në rrugë?!
