Policia e Kosovës ka njoftuar se një pjesëtar i saj është lënduar lehtë gjatë një sulmi të armatosur në veriun e Kosovës. Sulmi ka ndodhur reth orës 23:00 në fshatin Serbovc të komunës së Zveçanit.
“Njësitë që ishin në detyrë janë sulmuar nga persona të armatosur me armë të gjata, nga një automjet i tipit Audi, ngjyrë hiri, me targa KM. Si pasojë e incidentit, një pjesëtar i Policisë së Kosovës është lënduar lehtë dhe janë shkaktuar dëme të konsiderueshme materiale në veturën e policisë”- njofton policia.
Policia njoftoi se njësitet relevante policore kanë dalë në vendngjarje, për të kryer hetimet, kurse zyrtari policor i lënduar është transportuar në spital për t’i ofruar ndihmë mjekësore.
Sulmi ka ndodhur pak orë pasi Policia e Kosovës shtoi prezencën e saj në atë pjesë të Kosovës, ku ditëve të fundit janë shpeshtuar incidentet, por pa pasoja në njerëz.
