Sulmi i regjistruar ndaj kryetarit të Partisë Demokratike, Sali Berisha në protestën e 6 dhjetorit, është dënuar sot edhe nga Partitë Popullore Europiane.
Në një reagim të PPE-së për FaxNews, thuhet se PPE mbështet gjithmonë të drejtat demokratike të lirisë së tubimit dhe lirisë së shprehjes duke e konsideruar dhunën si mjet të pranueshëm në politikë.
“Si PPE ne kemi mbrojtur gjithmonë të drejtat demokratike të lirisë së tubimit dhe lirisë së shprehjes. Çdo sulm kundër çdo demonstruesi paqësor duhet të dënohet dhe shkeljet të hetohen dhe të ndiqen shpejt nga autoritetet kompetente. Dhuna nuk është kurrë një mjet i pranueshëm në politikë”, thuhet në reagim.
Ndërkohë, rasti i dhunës ndaj Berishës pritet të zbresë sot në gjykatë, aty ku 31-vjeçari Gert Shehu do të njihet me masën e sigurisë.
Shehu e sulmoi kreun e PD-së teksa ky i fundit ishte duke marshuar drejt bulevardit “Dëshmorët e Kombit” për të marrë pjesë në protestë.
31-vjeçari goditi me grusht në fytyrë Berishën duke e gjakosur dhe më pas u ndalua menjëherë nga truprojat e liderit të opozitës dhe simaptizantë të PD.
31-vjeçari u shoqërua nga policia dhe mori mjekim në spitalin e Traumës, pasi ka dëmtime në fytyrë dhe fraktura në hundë.
Oficerët kanë tentuar dy herë për të marrë në pyetje të riun, por për shkak të gjendjes së tij shëndetësore, ai nuk ka dhënë deri tani asnjë dëshmi, ndërsa fjalët e para që i ka komunikuar ish-zyrtarit të policisë Erzen Breçani, i cili e neutralizoi dhe e shoqëroi për te forcat e rendit ishin: “Ishte diçka që duhej bërë”.
