Deputeti i PD-së dhe kandidati për kryebashkiak të Tiranës, Belind Këlliçi, gjatë fjalës së tij në Kuvendin Kombëtar të FRPD-së në Ditën e Rinisë, falenderoi të pranishmit dhe në mënyrë të veçantë fëmijët e figurave që kanë ndërruar jetë në PD, vajzën e Azem Hajdarit, Vajzën e Bujar Nishanit dhe djalin e Sokol Olldashit.
Ai përkujtoi edhe vrasjen e Klodian Rashës dy vite më parë nga efektivi i Policisë, Nevaldo Hajdaraj dhe falenderoi Berishën për lëvizjen që nisi që prej vitit të kaluar për rithemelimin e PD-së.
Ndër të tjera, Këlliçi theksoi se rockstari i vërtetë i kësaj dite padyshim ishte Berisha, i cili u shfaq me syze dielli për shkak të dëmtimit në sy nga goditja me grusht që mori në protestën e opozitës më 6 Dhjetor në Bulevardin “Dëshmorët e Kombit”.
“Ditë shumë emocionuese, me fjalë të ndjera. Sot është ditë e veçantë, gëzuar Ditën e rinisë. Si kjo ditë, një i ri dy vite më pare, Klodian Rasha, humbi jetën, për shkak të dhunës policore, për shkak të atyre banditëve që kanë penetruar në policinë e Shtetit, që ngritën pardje dorë jo vetëm mbi Berishën por dhe mbi Partinë Demokratike. Këtu në skenë këndoi këngëtari i rrokut, Renis Gjoka, por rockstari i vërtetë ishte Sali Berisha, që në 2022-in është model frymëzimi për të rinjtë e vendit. Falënderimi shkon për Rudina Hajdarin, vajzn e Azem Hajdarit, Fiona Nishani, vajzën e ish-presidentit Bujar Nishani dhe Klauk Olldashi, djalin e Sokol Olldashi. Vij këtu dhe kam edhe kohën e limituar, pasi nuk jam më moderator.
Falenderoj në mënyrë të veçantë kryetarin e FRPD-së, Besart Xhaferrin. Edhe sot për mua është një ditë e veçantë pasi vij si një ish-drejtues që kemi bërë maksimumin për të qenë në vijë të parë të frontit kundër qeverisë. Ju treguat që ishit fibra e vërtetë e PD-së, i dhatë peshë asaj në më shumë se 32 vite. Në vetëm një vit kjo parti ka zhvilluar disa procese zgjedhore, për t’i kthyer votën anëtarëve të kësaj force politike. Vendimin ën 2009 mora vendim që të kthehem e ta ndërtoj të ardhmen time këtu. Por ju ftoj edhe juve që të gjithë të bëhemi bashkë e ta përmbysim këtë të keqe që po largon shqiptarët”, tha Këlliçi.
