Një ngjarje e rëndë është regjistruar në një shkollë 9-vjeçare, në Serres të Greqisë.
Sipas medias vendase një shpërthim ka ndodhur në shkollë duke shkaktuar vdekjen e një fëmije dhe plagosjen e dy të tjerëve.
Ende janë të paqarta rrethanat në të cilat ka ndodhur shpërthimi, ndërsa në vendngjarje kanë mbërritur menjëherë një ambulancë për të marrë fëmijët e plagosur dhe për t’i dërguar në spitalin e qytetit.
Sipas informacioneve, shpërthimi në kaldaja ka ndodhur gjatë pushimit, për pasojë pjesët e murit dhe një derë metalike janë hedhur tridhjetë metra larg, duke rënë mbi fëmijët.
Siç raporton për Protothema.gr një anëtar i shoqatës së prindërve dhe kujdestarëve, kaldaja është ndërruar këtë vit dhe ishte ndezur për herë të parë.
“Kaldaja ishte jashtë shkollës dhe nuk dihet se si ka shpërthyer. Me sa di unë kaldaja ishte e re, është instaluar këtë vit dhe nuk ishte përdorur në vitet e tjera. Tani askush nuk e di se çfarë ka ndodhur, vendi është bllokuar, prindërit kanë marrë fëmijët e tyre”, tha ajo.
Ndërkohë në një deklaratë të Ministrisë së Brendshme, Arsimit dhe Çështjeve Fetare thuhet: “Humbja tragjike e nxënëses së vogël në Serres na ka tronditur. Mendimet tona janë me prindërit dhe familjen e tij, si dhe me familjet e fëmijëve të plagosur. Jemi në kontakt me bashkinë përgjegjëse për funksionimin e shkollës për të hetuar se çfarë ka ndodhur saktësisht. Ne do të bëjmë gjithçka që kemi në dorë për të hetuar shkaqet e humbjes tragjike dhe për të caktuar përgjegjësinë”.
