Ditën e nesërme (4 dhjetor) do të zhvillohen Primaret në Partinë Demokratike.
PD ka bërë publike fletën për primaret e Tiranës. Siç shihet në foto, janë të renditura emrat e 7 kandidatëve sipas radhës.
Zgjedhjet do të zhvillohen në të gjithë Shqipërinë ku do të dalë vetëm një kadidat nga ata që do përzgjidhen që më pas të kadidojë për në zgjedhjet e 14 majit të vitit të ardhshëm.
Vetëm pak orë para se të nisë procesi i votimit, nuk dihet se sa është numri total i anëtarëve dhe i simpatizantëve që do të kenë të drejtë vote në të gjitha bashkitë.
Nuk dihet gjithashtu se kur do të jetë data e balotazhit në ato bashki ku ka më tepër se 2 kandidatë dhe ku asnjë prej garuesve nuk do mund të marrë më shumë se 51% të votave.
Përveç këtyre, problematike ka qenë edhe prezantimi i kandidatëve ku për 5 bashki, nuk pati asnjë vendim zyrtar nga kryesia e Partisë Demokratike për kandidatët që garojnë.
Si rrjedhojë e kësaj mangësie, nuk është bërë i ditur numri total i kandidatëve që do të garojnë në të gjitha bashkitë. Por janë edhe 6 bashki ku nuk ka patur nevojë për primare, pasi në garë ka hyrë vetëm një kandidat.
Në respekt të marrëveshjes që Berisha dhe Meta firmosën pak javë më parë, në procesin e primareve janë përfshirë edhe kandidatë të Partisë së Lirisë.
Incidenti më i rëndë i regjistruar në këtë proces, ishte përplasja mes mbështetësve të kandidatëve në Primaret e Kurbinit, ku debati degjeneroi edhe në përdorimin e armës së zjarrit, por fatmirësisht pa të lënduar.
