Pesë punëtorë që po kryenin rikonstruksionin e një godine në Paola të Maltës mbetën nën rrënojat e saj pasi ndërtesa u shemb mëngjesin e kësaj të shtune.
Punonjësit e ekipeve të shpëtimit nxorën nga rrënojat ende me shenja jete pesë punëtorët e sektorit të ndërtimit dhe autoritetet malteze sqaruan për mediat se bëhet fjalë për tre shtetas shqiptarë, një boshnjak dhe një maltez.
Një numër i madh personash nga Emergjencat Civile malteze u përfshinë në një operacion delikat për të nxjerrë të plagosurit nga rrënojat.
Burrat po punonin në kantierin e ndërtimit, i cili ndodhet pranë stacionit të zjarrfikësve në pronën industriale Corradino të Paolas, kur ndërtesa u shemb pjesërisht rreth orës 10:00 të mëngjesit.
Një operacion shpëtimi filloi shpejt dhe brenda disa orësh pesë punëtorë u gjetën dhe u dërguan në spitalin Mater Dei.
Tre shqiptarët e plagosur janë në gjendje të rëndë dhe po trajtohen në Njësinë e Mjekimit Intensiv të spitalit.
Sipas një zëdhënësi të policisë, një person i gjashtë mbetet ende i zhdukur. Ai është 20-vjeçar maltez që dyshohet se ka dërguar disa mjete në kantier dhe ka qenë brenda strukturës vetëm për rreth 8 minuta kur ka ndodhur ngjarja.
Policia dhe disa ambulanca janë ende në vendngjarje dhe një operacion shpëtimi që përfshin personelin e PKD-së dhe qentë e shpëtimit është duke u zhvilluar.
Dronët gjithashtu u përdorën për të ndihmuar në identifikimin e çdo zone që rrezikon kolapsin e mëtejshëm të godinës.
Ministri i Punëve të Brendshme, Byron Camilleri, lavdëroi punonjësit e shpëtimit, duke e përshkruar atë si një nga operacionet më delikate dhe më të vështira të kryera në Maltë.
Një person që postoi në mediat sociale pamje nga vendngjarja pretendoi se shembja ndodhi teksa punëtorët po derdhnin beton në strukturë.
Sakaq, një video që tregon një punëtor të varur në një pompues betoni në një përpjekje të dëshpëruar për të qëndruar gjallë po qarkullon në rrjet.
Një video tjetër e marrë nga vendi i shembjes tregoi shtrirjen e tragjedisë, me blloqe betoni, metal dhe dru të rëna në tokë.
Times of Malta foli me një dëshmitar që e pa incidentin, i cili tha: “Disa fëmijë po luanin një ndeshje futbolli në një fushë aty pranë dhe prindërit e tyre po shikonin. Papritur dëgjuam një zhurmë të madhe, të ngjashme me tërmetin, të një ndërtese që u shemb”.
“Të gjithë mbetën të shtangur. Ndeshja ndaloi dhe të gjithë pamë nga ndërtesa. Nuk e kuptuam menjëherë se çfarë kishte ndodhur. Menduam se ndoshta po e prishnin ndërtesën. Por disa sekonda më vonë ne pamë një burrë të varur. Në luftë për jetën në tubin e betonit. Atëherë e kuptuam se kjo ishte një tragjedi“, shtoi ai.
