700 banorë të Kamzës vazhdojnë të jenë në pritje të përgjigje meqë jetojnë në ndërtesa të amortizuara dhe të shkatërruara nga tërmeti i 26 nëntorit 2019.
Edhe pas 3 vitesh, këta banorë nuk janë ndihmuar nga Bashkia Kamëz. Ata akuzojnë Kryetarin e kësaj Bashkie Rakip Suli dhe vartësit e tij për falsifikim dokumentesh për të mos ndërhyrë në këto godina.
141 familjet nuk kanë ende asnjë përgjigje dhe asnjë ndihmë nga qeveria apo pushteti lokal. Disa nga ta, thotë se nga kjo ndërtesë e përbashkët disa kanë marrë përgjigje e të tjerë. Shumë nga ta e shpjegojnë në aspektin politike, varësisht nga preferencat partiake, të të dëmtuarve.
“Jetoj në shtëpinë e djalit këtu në lagjen nr/6 në Bathore, dhe është shkatërruar. Nuk kemi marrë asnjë përgjigje, pse nuk na i japim, nuk dimë gjë këtu, ende jemi në këtë banesë të shkatërruar, banesa është e legalizuar dhe nuk po na japin lekët”, tha një banor.
“Ne pas tërmetit, e vonuam pak aplikimin, ata e panë dëmtimin, por nuk u interesuan më. Disa i kanë marrë lekët e disa jo, shpresojmë të na japin paratë. Kemi qenë disa here edhe deri te perfekti, edhe sot ishim në bashki, nuk na japin kompensimin e dëmtimit nga tërmeti. Ajo ndërtesë është kolektive, dhe erdhën ekspertët, i njëjti mur na ndanë, ai matanë murit ka marrë leke, unë jo”, u shpreh një tjetër për të njëjtën problematikë.
“Kam ardhur që në vitin 1991 në këtë banesë, banesa ishte në proces legalizimi, kur ra tërmeti, bëmë ankesë, kryetari i bashkisë tha aplikoni, i bëmë letrat deri te noteri, dhe në fund nuk u interesua askush. Kur erdhi komisioni, si dëm u vlerësua, por parat e kompensimit nuk na dhanë. Disa i kanë marrë lekët, neve na ndan ky mur me 4 familje, ata i kanë marrë, unë jo. Po na ndajnë me parti, ata që janë më socialistet i kanë marrë, unë që kam qene familje e persekutuar, nuk mi kanë dhënë. Dëmi ka qenë i vlerësuar në shkallën DS3”, tha banori.
