Projekti i ri i Portit të Durrësit përmban rrezikun e fryrjes së faturës nga Arbitrazhet. Megjithatë, drejtori i Portit të Durrësit Pirro Vëngu e anashkalon këtë aspekt.
Së fundmi, kompania gjermane që ka një kontratë koncesionare 35-vjeçare për kalatën lindore të Portit të Durrësit ka paralajmëruar Kuvendin se do ta çojë çështjen në Arbitrazh.
Faktin e bëri me dije kreu i PD-së Sali Berisha në një deklaratë për mediat më 23 Nëntor. Ai shprehu shqetësim për një “gjobë” të mundshme që mund ti faturohet Shqipërisë nga veprimi i njëanshëm i qeverisë për ndërprerjen e kontratës.
“Kompania gjermane EMS Shipping and Trading, e referuar si EMS, i është drejtuar me një letër parlamentit shqiptar. Kompania ka një kontratë 35-vjeçare për kalatën lindore të portit të Durrësit. Ka një detyrim investimi vetë prej mbi 15 milionë euro. Kompania i drejtohet parlamentit: ne kemi shqyrtuar projektligjin dhe marrëveshjen kuadër së bashku me anekset të publikuar në faqen e Kuvendit. Ato bien ndesh me marrëveshjen e koncesionit të EMS. Kompania konstaton se qeveria apo binomi Rama-Balluku po mashtrojnë”, sqaroi Berisha.
“Sipas relacionit shpjegues, të projektligjit, aktiviteti i portit të Durrësit, as nuk do ndërpritet dhe as pengohet gjatë zhvillimit të projektit. Kompania thotë se gjuha e relacionit, edhe pse e paqartë, nuk është në dijeni të një afati kohor brenda të cilit qeveria shqiptare është në gjendje të ndërtojë një port të ri. Sipas kontratës, EMS thotë se ruan të drejtën që të marrë masa ligjore për përfundim të parakohshëm të kësaj kontrate, që mund t’u kushtojë shqiptarëve 200-300 milionë euro pa asnjë hezitim. Shqiptarët do paguajnë haraçin, përveç 2 miliardë për portin e ri, do paguajnë edhe gjobat e tmerrshme”, shtoi ai.
Për këtë fakt, u pyet në emisionin “Opinion” mbrëmjen e kësaj të Mërkure, drejtori i Portit të Durrës Pirro Vëngu.
Ky i fundit u përgjigj shkurtimisht se kompania “ka rënë dakord”.
Deklaratë e dyshimtë kjo e drejtorit të portit që vjen në një kohë kur kompania në fjalë ka ngritur alarmin në parlament për çështjen.
Ndërkohë, ekspertë të ekonomisë kanë shprehur shqetësim se jo vetëm kompanitë koncesionare, por edhe nënkontraktorët mund të ngenë padi ndaj shtetit Shqiptar për transferimin e shërbimeve në portin tregtar në Porto Romano, siç pretendon qeveria.
