Indikacionet se Rusia po përgatit një sulm ajror në shkallë të gjerë ndaj Ukrainës janë krijuar së fundmi për shkak të përqendrimit të madh të avionëve bombardues në një bazë ajrore pranë qytetit të Saratov.
Sipas DailyMail rreth 24 bombardues me rreze të gjatë Tu-95 dhe Tu-160 janë mbledhur në një bazë ajrore ruse, në kufijtë e NATO-s së bashku me personelin e nevojshëm mbështetës.
Duhet theksuar se vetëm dje ministri rus i Mbrojtjes Sergei Shoigu u kërkoi zyrtarëve rusë vendosjen e armëve moderne në Ukrainë, ndërsa ukrainasit besojnë se sulmet ndaj infrastrukturës energjetike të vendit do të intensifikohen në orët në vijim.
Pamjet nga fusha ajrore ku u montuan bombarduesit rusë u kapën më 28 nëntor dhe u publikuan fillimisht nga Der Spiegel.
“Numri jashtëzakonisht i madh i bombarduesve në terren është një tregues i një rritje të operacioneve, nëse jo një sulm i afërt në shkallë të gjerë“, i tha revistës analisti ushtarak Arda Mevlutoğlu.
Kryebashkiaku i Kievit u bëri thirrje sot banorëve të kryeqytetit ukrainas që të rezervojnë ujë, ushqim dhe rroba të ngrohta, në rast të një ndërprerjeje totale për shkak të bombardimeve ajrore ruse.
“Nëse munden, banorët duhet të mendojnë të qëndrojnë me miqtë në periferi të qytetit”, tha ai.
Vitali Klitschko paralajmëroi se temperatura brenda shtëpive mund të bjerë në mënyrë dramatike nëse ka ndërprerje dhe infrastruktura shkatërrohet nëse nuk ka energji elektrike, ujë dhe ngrohje.
“Temperatura në apartamente mund të mos jetë shumë e ndryshme nga ajo e jashtme“, tha ish-kampioni i boksit në një forum sigurie të organizuar në Kiev.
Sot në kryeqytet termometri ka treguar -4 gradë Celsius. Shumë termocentrale anembanë Ukrainës janë mbyllur këtë javë pas sulmeve me raketa ruse.
Autoritetet e Kievit kanë organizuar 430 vende ku njerëzit mund të ngrohen dhe të karikojnë celularët e tyre, por kryebashkiaku shpjegoi se ky numër nuk është i mjaftueshëm për një qytet me 3.5 milionë banorë.
“Nuk do të mjaftonin as 500 hapësira, edhe 5000 do të ishin shumë pak”, theksoi ai.
