Lufta që vendi duhet të bëjë ndaj korrupsionit, ishte një porosi e Presidentit gjerman në Tiranë, këtë të Enjte.
Për herë të parë pas 27 vitesh, një President i Gjermanisë vizitoi Shqipërinë. Frank-Walter Steinmeier mbajti dy fjalime. Një nga Presidenca në një konferencë të përbashkët me homologun shqiptar, si dhe tjetrin nga foltorja e Kuvendit.
Në të dyja deklaratat, e vuri theksin te korrupsioni.
Nga konferenca me kreun e shtetit shqiptar Bajram Begaj, u shpreh se lufta ndaj korrupsionit dhe ndaj krimit të organizuar është vendimtare për anëtarësimin në BE të Shqipërisë.
“Lufta kundër korrupsionit dhe krimit të organizuar ka kërkuar një volum vërtet të madh pune e përpjekjesh dhe sukseset në këtë rrugë janë vendimtare për anëtarësimin në BE pasi BE e konsideron si bazë e të drejtës në rrugën e demokracisë funksionale”, theksoi.
Nga parlamenti, udhëzoi që të punohet për zmbrapsjen e korrupsionit.
“Unë e di që rruga juaj në BE do të vijojë të jetë ambicioze, ndaj punoni më tej në zbutjen e pengesave atje ku ndodhen, punoni në zmbrapsjen e korrupsionit vijoni reformën në drejtësi, dhe punoni përtej llogoreve mes opozitës dhe qeverisë”, ishte porosia e kreut të shtetit gjerman.
Korrupsioni – shqetësim i biznesit gjerman
Më herët ambasadori i Gjermanisë në Tiranë Peter Zingraf ka shprehur shqetësim për gjendjen e korrupsionit në vend.
Disa muaj më parë, në prezantimin e gjetjeve të një vrojtimi nga Dhoma Gjermane e Industrisë dhe Tregtisë, korrupsioni, mungesa e transparencës në prokurimet publike dhe siguria ligjore shiheshin si problemet më të mëdha.
“Është frustrues problemi i korrupsionit, të cilin e kam dëgjuar që kur kam ardhur [në Shqipëri]”, tha Zingraff para gazetarëve në Qershor.
Edhe Europa e shqetësuar
Prej asaj kohe, gjerat duket se nuk janë përmirësuar aspak. Europa vijon të jetë e shqetësuar me nivelin e korrupsionit në Shqipëri, luftën ndaj krimit të organizuar dhe lirinë e medias. Kjo duket në dokumentin me draft-rekomandimet e Komitetit Ndërparlamentar të Stabilizim-Asociimit Shqipëri-BE, publikuar nga media një ditë më parë.
“I bëjmë thirrje autoriteteve shqiptare për të vijuar eliminimin e korrupsionit dhe aktiviteteve kriminale, në veçanti në nivelet e larta, nga të gjitha fushat e jetës publike, duke përfshirë nga procedurat e prokurimeve publike deri te financimet e partive politike. Shënim, me shqetësim që Shqipëria ka rënë me 27 pozicione nga 2016 në Indeksin e Perceptimit të Korrupsionit të Transparency International’”, thuhet në draft.
Në raportin e fundit të Transparency International, Shqipëria shënoi një pikë rënie, krahasuar me një vit më parë.
Korrupsioni dhe emigrimi
Në raporte e artikuj mediatike korrupsioni përmendet si një dnër shkaqet e migrimit të shqiptarëve, që shifrat po e vërtetojnë se është kthyer në një fenomen në masë.
“Korrupsioni vijon të mbetet shqetësues. Pra, nëse ne me Reformën në Drejtësi mendonim se do të çrrënjosnim korrupsionin nga sektori publik dhe privat, perceptimet vijojnë të jenë ende të larta edhe nga takimet që ne kemi me qytetarët, por edhe me të rinjtë, ku, një pjesë, arsyet e largimit të tyre lidhen me mungesën e meritokracisë, korrupsionin, me faktin që nuk kanë mundësi të mjaftueshme dhe të përshtatshme për ta. Pra, vijojmë të jemi në termat e shqetësimit të niveleve të korrupsionit”, u citua nga Zëri i Amerikës drejtuesja ekzekutive e Komitetit Shqiptar të Helsinkit, Erida Skëndaj, gjatë një takimi në Shkodër disa javë më parë.
Shkak për emigrimin e të rinjve shqiptarë, korrupsioni përmendet gjegjësisht edhe në raportimet e mediave të huaja prestigjioze.
Në një artikull të publikuar së fundmi, BBC, duke iu referuar një sondazhi të Gallup, liston korrupsionin si një ndër arsyet pse shqiptarët duan të lënë Atdheun.
Daily Mail, po ashtu, ka shkruar për një “korrupsionin endemik që godet pothuajse çdo shtresë të shoqërisë.
Nicola Gratteri, një nga prokurorët më të shquar italian në luftën kundër mafias në shtetin fqinjë, foli për “korrupsioni të frikshëm” në Shqipëri, që sipas tij mundëson forcimin e krimit.
Është e gjatë lista e raporteve, mediave, autoriteteve, të cilat dëshmojnë për gëlimin e korrupsionit në rritje në Shqipëri, që duket si një damkë që ka mbërthyer vendin, peshqesh nga qeveria Rama.
/Boldnews.al/
